एजेन्सी । कोरोना भाइरसको संक्रमण विश्वव्यापी बननिरहँदा छिमेकी मुलुक भारतमा कोरोना संक्रमणबाट पहिलोपटक एक जना मानिसको ज्यान गएको छ । भारत कर्नाटकका ७६ वर्षीय एक व्यक्तिको कारोना संक्रमणका कारण ज्यान गएको हो । भारतको स्वस्थ्य मन्त्रालयले एक विज्ञप्ति जारी गर्दै कारोना संक्रमित एकजनाको मृत्यु भएको पुष्टि गरेको छ । मन्त्रालयका अनुसार ती व्यक्ति २९ जनवरी २०२० देखि २९ फेब्रुअरी २०२० सम्म साउदी अरबमा बिताएर भारत फर्किएका थिए । साउदीबाट फर्किएलगत्तै उनमा श्वासप्रश्वास र निमोनिया देखिएको थियो । कर्नाटक राज्यको स्वास्थ्य तथा परिवार कल्याण विभागले सबै दिशानिर्देशनहरूको पालना गरिएको जनाउँदै ती व्यक्तिको सम्पर्कमा पुगेका सबैलाई ल्याउने प्रयास भइरहेको जनाएको छ । कोरोना संक्रमण फैलन थालेसँगै भारतले सतर्कता अपनाएको छ । उसले बुधबारमात्रै १५ अप्रिलसम्म सबै भिसा निलम्बन गर्ने निर्णय गरेको छ ।