काठमाडौं । देशमा झण्डै आधा जिल्लामा लडकउान गरिए पनि कारोना संक्रमणको अवस्था दिनदिनै भयाबह बन्दै गएको छ । सरकारले उपचारका लागि अस्पतालका बेड उपलब्ध गराउन नसक्ने घोषणा गरिरहँदा दिनदिनै ६/७ हजार संक्रमित थपिँदा भोलिका दिन कति भयाबह होला भन्ने अनुमान मात्रै गर्न सकिन्छ ।
पछिल्लो २४ घण्टामा थप ७२११ जनामा कोरोना भाइरसको संक्रमण पुष्टि भएको छ । पीसीआर विधिबाट ७१३४ र एन्टिजेन विधिबाट ७४ जनामा संक्रमण पुष्टि भएको हो । यो नेपालमा एक दिनमा भेटिएको अहिलेसम्मकै सबैभन्दा धेरै संक्रमित हो । शनिबार मात्र नयाँ संक्रमितको संख्यामा रेकर्ड ५७६३ संक्रमित फेला परेका थिए । एकै दिनमा यो रेकर्ड तोडिएको हो ।
योसँगै नेपालमा कूल संक्रमितको संख्या ३ लाख ३६ हजार ३० पुगेको छ । यही अवधिमा थप १ हजार ६१२ जना निको पनि भएका छन् । नेपालमा हालसम्म २ लाख ८३ हजार ९९४ जना संक्रमित निको भइसकेका छन् । पछिल्लो २४ घण्टामा २७ जनाको मृत्यु भएको छ । हालसम्म ३३ सय २५ जनाले ज्यान गुमाइसकेका छन् ।
