काठमाडौँ । घर परिवार छाड्नुको पीडा एकातिर छ भने अर्कोतिर रोगको आतंकबीचमा लाखौं नेपाली विदेशी भूमिमा रहेका छन् । बहराइनमा कोरोना संक्रमित एक नेपाली कामदारले क्वारेन्टाइनमा बिहीबार आत्महत्या गरेका छन् । ताप्लेजुङका ३८ वर्षीय एक पुरुषले उपचार भइरहेका बेला आत्महत्या गरेका हुन् । उनी एक्सिलेन्सी इन्डस्ट्रियल एण्ड मेन्टिनेन्स कम्पनीमा कार्यरत थिए । बहराइनका लागि नेपाली राजदूत पदम सुन्दासले आत्महत्याको पुष्टि गरेका छन् । राजदूत सुन्दासले बहराइनमा कोरोना संक्रमितको गुणस्तरीय उपचार भइरहेको जानकारी दिँदै नेपाली समुदायलाई नअत्तालिन आग्रह गरेका छन् । अहिलेसम्म ३ सय ३१ जना नेपालीलाई पोजिटिभ देखिएको हो । त्यसमा धेरैजसो निको पनि भइसकेका छन्, उनले भने ।