मुम्बई । यो समाचारले बलिउड सुपरस्टार अभिताव बच्चनका हामी सबै फ्यानको चित्त कुडिन सक्छ । भारतीय टेलिभिजन सोनी च्यानलमा प्रशारण हुने ‘कौन बनेगा करोडपति’को १२औँ सिजनको ग्रान्ड फिनाले आज हुने भएको छ। ग्रान्ड फिनालेमा करगिल युद्धका वीर जवानहरुलाई समावेश गरिने बताइएको छ। च्यानलले एक प्रोमो रिलिज गर्दै फिनाले जवानहरुप्रति समर्पित हुने जनाएको छ। प्रोमोमा अमिताभ बच्चनले वीरहरुको परिचय दिएका छन्। जवानहरुको सम्मानको लागि उनले कविता समेत सुनाएका छन्। हट सिटमा परमिर चक्रबाट सम्मानित सूबेदार प्रमुख योगेन्द्र सिंह यादव र सूबेदार संजय बसेका हुन्छन्।
केबीसीको १२ औँ सिजनको पहिलो एपिसोड कोरोनाको नियन्त्रणमा खटिएका योद्धाप्रति समर्पित थियो भने अन्तिम एपिसोड करगिल युद्धका वीरहरुप्रति समर्पित हुनेछ। पछिल्लो वर्ष सेप्टेम्बरमा शो शुरु भएदेखि चार प्रतियोगीले १ करोड जितिसकेका छन्। जसमा चारै जना महिला रहेका छन्। यसका साथै अमिताभको यो नै अन्तिम शो हुनेछ। उनले केबीसीबाट अवकाश समेत लिने बताइएको छ।