एजेन्सी । गरिबहरुका लागि खाना बनाउने र बाँड्ने अधिकारीमा नै कोरोना देखिएपछि भारतमा आतंक फैलिएको छ । भारतको मध्य प्रदेशको राजधानी भोपालमा यस्तो घटना भएको हो । लकडाउनको घोषणा पछि गरिबहरुका लागि खाना वितरण गर्ने जिम्मा पाएका भोपाल नगर निगमका एक अधिकारीमा कोरोना पोजिटिभ देखिएको हो । योसँगै नगर निगमका समग्र अधिकारी र कर्मचारीहरुमा त्रास उत्पन्न भएको छ । त्यहाँ एक हजारभन्दा अधिक मानिसहरु दैनिक सहुलियत दरमा खाना खान जाने गर्दथे । उक्त भान्सामा गरिबहरुका लागि पनि खानाको प्याकेट तयार पारिन्थ्यो । ती अधिकारीको सम्पर्कमा आएका मानिसहरुको पत्ता लगाउने प्रयास भइरहेको छ, किनकि उनी खाना बनाउने र बाड्ने काममा जोडिएका थिए । उनी धेरै मानिसहरुको नजिक रहेने भएकाले पनि कन्ट्याक्ट ट्रेसिङमा सामान्यभन्दा धेरै समय लागिरहेको छ । नगर निगमका २० जना कर्मचारीहरुको नमुना पनि लिइएको छ, जो नियमित रुपमा ती अधिकारीको सम्पर्कमा थिए । जिल्ला प्रशासनका एक अधिकारीका अनुसार, जो मानिस ती अधिकारीको सम्पर्कमा थिए, उनीहरुलाई तुरुन्तै सेल्फ क्वारेन्टाइनमा जानका लागि भनिएको छ ।