काठमाडौं । गरिमा विकास बैंक १८औं वर्षमा प्रवेश गरेको छ । आजभन्दा १७ वर्षअगाडि शिक्षण, इन्जिनियरियङ, चिकित्सा, बैंकिङ तथा विभिन्न पेशा–व्यवसायमा संलग्न प्रतिष्ठित व्यक्तिहरूबाट बैंक स्थापना भएको थियो । कम्पनी ऐनअनुसार २०६४ साउन २२ गते गरिमा विकास बैंकको स्थापना भएको हो । २०६४ असोज २४ गतेदेखि वित्तीय कारोबार गर्न नेपाल राष्ट्र बैंकबाट अनुमतिपत्र पाएको थियो । विसं २०६४ कात्तिक १८ गते वालिङ नगरपालिका ३ स्याङ्जाबाट कारोबार सुरु गरेको बैंकले साबिक निलगिरि विकास बैंक र शुभेच्छा विकास बैंकसँगको मर्जरपछि २०७२ असार २९ गते राष्ट्रियस्तरको विकास बैंक बनेको थियो । बदलिँदो समय, बजार सुहाउँदो र प्रविधिको अधिकतम उपयोग गर्दै बैंकले देशैभर १२३ शाखा कार्यालय, १ एक्सटेन्सन काउण्टर र ५१ एटीएम काउन्टरमार्फत ग्राहकलाई सेवा दिँदै आएको छ । चालू आर्थिक वर्षको पहिलो त्रैमाससम्मको तथ्यांकनुसार बैंकको चुक्ता पुँजी ५ अर्ब ६८ करोड, सञ्चित नाफा ६८ करोड ४४ लाख, जगेडा कोष २ अर्ब ८४ करोड रुपियाँ रहेको छ । त्यस्तै, बैंकले ८३ अर्ब २७ करोड रुपियाँ निक्षेप संकलन गरी ६८ अर्ब ४१ करोड रुपियाँ कर्जा लगानी गरेको छ । तीन महिनामा २२ करोड ५७ लाख रुपियाँ खुद नाफा गरेको बैंकको खराब कर्जा ३.८२ प्रतिशत रहेको छ ।