काठमाडौं । आङै सिरिङ्ग हुने गोंगबु हत्याकाण्डको पर्दा उघायरिएको छ । दुइ दिनसम्म प्रहरीलाई समेत हम्मे हम्मे बनाएको घटना पर्दाफास हुन धेरै समय लागेन । रहस्यका सबै पर्दाहरु उदांगिएका छन् ।
मंगलबार काठमाडौँ प्रहरी प्रमुख प्रहरी बरीष्ठ उपरिक्षक (एसएसपी) श्यामलाल ज्ञवाली र अपराध महाशाखा प्रमुख एसएसपी दीपक थापाले संयुक्त पत्रकार सम्मेलन गरेर दाङका ४५ वर्षीय कृष्णबहादुर बोहोराको हत्यामा संलग्न भएको भन्दै कल्पना मुडभरी (पौडेल)लाई सार्वजनिक गरेका छन् ।
मृतकको पहिचान खुलाउनै नसकेपछि प्रहरीले मृतकको फोटो सार्वजनिक गरेर व्यक्तिको पहिचान गरेको थियो । मृतकका मामाले प्रहरीलाई दिएको ‘क्लू’ पछिनै प्रहरीले नवज्योती मार्गमा बस्ने कल्पना को डेरा खोज्न थालेको थियो ।
यस्तो थियो घटना
शनिवार साँझ ५ बजे रुस्लान भोड्का लिएर कृष्णबहादुर कल्पनाको कोठमा पुगेको देखिन्छ । कल्पना र दुई छोरा–छोरी त्यहाँ बस्ने गरेका थिए। कृष्ण पुगेपछि कल्पनाले दही र चिउरा खुवाएकी थिइन् । दहीमा ५ वटा स्लिपिङ ट्याब्लेट घोलेका कारण कृष्ण त्यसै झुम्म भए । त्यसपछि कल्पना र कृष्णले भोड्का र मासु खाए । नसाको सुरमा लठ्ठ परेर सुतेको मौकामा कल्पनाले ह्यामरले कृष्णको अण्डकोषमा प्रहार गरिन् । त्यसपछि सलले घाँटी बाँधेर मरेको यकिन गरेपछि बाथरुममा लगेर कृष्णबहादुर शवलाई टुक्रा टुक्रा पारेको उनले स्वीकार गरेकी छिन् । कृष्णबहादुरको हत्या गरि टुक्रापरी सक्दा करिब ११ बजेको थियो ।
बाहिर पानी दर्किरहेको बेला मध्य राति करिब १२ बजेतिर कल्पनाले टाउको र खुट्टा लगेर डेरा नजिकै स्वर्गद्वारी मार्गको खाली जमिनको कुनामा छाडेर आएकी थिइन् । करिब १ बजेतिर सुटकेशमा प्याक गरिएको कृष्णबहादुरको जिउ फाल्नका लागि उनले छोरीलाई बोलाइन् । नाम्लो लगाएर कल्पनाले नै शव बोकेको र छोरीले छाता ओढाएको आरोपीको बयानबाट खुलेको छ ।
चार बर्षअघि कल्पना र कृष्णबहादुरबीच चिनजानभएको प्रारम्भिक अनुसन्धानबाट खुलेको छ । त्यतिबेला बोहरा विदेशमा थिए । पछिल्लो तीन बर्षयता काठमाडौँमा उनीहरुबीच बाक्लै भेट भइरहन्थ्यो । कमला पौडेलको नामबाट कल्पनाले फेसबुक चलाउँथिन् । तर, उनको फोटो राखेर बोहराले ‘कल्पना शाही’ नामबाट फेसबुक आईडी बनाए । सो आईडीबाट अरु केटाहरुलाई फिसिङ गर्न थाले ।
बोहोराको कर्तुत थाहा पाएपछि कल्पनाले त्यसो नगर्न भनिन् । तर, उनलाई उल्टो ‘नाङ्गो फोटो सार्वजनिक गर्दिने’ धम्की दिन थाले । कक्षा १० मा पढ्ने छोरीलाई पनि बोहराले गलत नियतले हेर्न थालेपछि कल्पना रुष्ट थिइन् । ‘हर्केहल्दार’ टेली श्रृङ्खलामा एउटा भागमा अभिनय गरेकी कल्पनाले त्यसपछि बोहोरालाई सँधैका लागि साइड लगाउने निधो गरिन् । उनीसँगै १५ वर्षीया छोरी पनि पक्राउ परेकी छन् । तर नाबालिका भएकाले उनलाई सार्वजनिक गरिएको छैन । छोरा उनीभन्दा पनि कम उमेरका छन् भने घटनाबारे कुनै जानकारी छैन । आइतबार बिहान ७ बजे प्रहरीले शव बरामद गरेको पौडेलले थाहा पाइसकेकी थिइन् ।
घरको छतबाट शव बरामद स्थल देखिने भएकाले प्रहरीको बाक्लो परिचालन देख्न उनलाई गाह्रो थिएन । प्रहरीले केन्द्रीय कुकुर तालिम केन्द्रबाट विशेष तालिम प्राप्त कुकुर जोजोलाई ल्याएपछि भने उनी डराएकी थिइन् । उनले बयानमा भने अनुसार कुकुर घरै अगाडिबाट हिँडेपछि आमाछोरी दुवै अताल्लिएका थिए । पौडेलसँग मृतकको अवैध सम्बन्ध रहेको प्रहरीले बताएको छ । पौडेलका श्रीमान विदेशमा छन् र, पछिल्लो समय राम्रो सम्बन्ध छैन । मृतक बोहरा विदेशबाट फर्किएका व्यक्ति हुन् । दुई जनासँग विवाह गरे पनि डिभोर्स भइसकेको थियो ।
