काठमाडौं । तीन महिनाको अन्तरालमा कार्यालयहरु खुलेका छन् । धेरै कर्मचारीलाई चिन्ता छ कसरी सामाजिक दूरी कायम गरी आफू र आफ्ना परिवारलाई कोरोना संक्रमण हुनबाट जोगाउने । तर ती महिनादेखि घुस खान नपाएका केही बदनाम कर्मचारी भने कहिले खुल्ला भनेर कुरेरै बसेका रहेछन् । ३ महिना लकडाउनपछि कार्यालय खुलेकै भोलिपल्ट मालपोत कार्यालय डिल्लीबजारमा ८ लाख रुपैयाँ घुस लेनदेन गर्दागर्दै प्रशासकीय अधिकृत रघु कँडेलसहित ५ जना पक्राउ परेका छन् । अख्तियार दुरुपयोग अनुसन्धान आयोगको टोलीले उनीहरुलाई घुससहित मंगलबार राति पक्राउ गरेको हो । गोंगबुको ३ रोपनी जग्गा कित्ताकाटका लागि प्रतिआना २ लाखका दरले घुस मागेका थिए । सेवाग्राहीले अख्तियारसँग सम्पर्क गरी ८ लाख २० हजार घुस दिएपछि कँडेलसहित ५ जना पक्राउ परेका छन् । घुससहित पक्राउ परेकाहरुको अनुसन्धान भइरहेको प्रहरीले जनाएको छ ।