जनकपुर । जनकपुरधाममा २ जना महिलाले सडकमा यत्रतत्र १० रुपैयाँका नोट फ्यालेर भागेपछि स्थानीय त्रसित बनेका छन् । कोरोना भाइरस संक्रमण फैलने उद्देश्यले सो पैसा फालिएको आशंका स्थानीयले गरेका छन् । जनकपुरधाम–४ मा पर्ने महावीर चोकमा अपरिचित २ महिलाले सडक र पसल अगाडी रकम फ्यालेर भागेका थिए ।
शुक्रबार करिब १ बजे २ जना महिलाले १० रुपैयाँको नोट फालेका थिए । निलो र हरियो रंगको साडी लगाएका ती महिलाले करिब सय मिटरको दूरीसम्म सडक र पसलअगाडि पैसा फ्यालेको स्थानीयवासीहरुले बताएका छन् । मुस्लिमजस्तै देखिने ती महिलालाई स्थानीले पैसा किन फ्यालेको भनी सोध्दा उनीहरु भागेका थिए । तीन चारजना बटुवाले उनीहरुले फ्यालेको नोट सडकबाट उठाएका छन् । घटनालगत्तै स्थानीयवासीले प्रहरीलाई जानकारी गराएका थिए भने प्रहरी टोलीले नोट छरिएको ठाउँमा सेनिटाइजर छर्केको र सडकमा छरिएका केही नोट उठाएको थियो ।