दक्षिण कोरिया । अहिले कोरोना आतंकले विश्वका ठूला र शक्ति सम्पन्न भनिएका मुलुकहरु समेत आतंकित र कोरोनासँग पराजित भइरहेका छन् । नेपाल जस्तो अल्पविकसित मुलुकलाई कोरोनाको आतंकबाट बचाउन सरकार मात्रै होइन सबै क्षेत्रबाट हरसम्भव प्रयास जारी नै रहेको छ । कोरोनाविरुद्धको अभियानका लागि दक्षिण कोरियाका नेपालीहरुले नेपाललाई चार हजार कोरोना टेष्टिङ किटसहित ७५ लाखभन्दा बढीको औषधिजन्य सामग्री पठाएका छन् । कोरोना भाइरसबाट विश्व त्रसित भइरहेका बेला दक्षिण कोरियामा रहेका नेपालीले नेपालमा संक्रमण देखा पर्नुपूर्व नै सम्भावित जोखिमलाई ध्यानमा राखेर ‘एक व्यक्ति, एक हेल्थ किट अभियान’ सुरु गरेका थिए । गैरआवासीय नेपाली संघ (एनआरएनए) दक्षिण कोरियाको संयोजन तथा स्वतन्त्र अभियन्ताहरुको सहकार्यमा अभियान सुरु गरिएको थियो । अभियान सुरु गरेको चार दिनमै १४ करोड २६ लाख ३७ हजार सात सय ७९ वोन अर्थात् एक करोड ४० लाख ७९ हजार सात सय ७५ रुपैयाँ संकलन भएको थियो । मातृभूमिमा परेको विपतको घडीमा सहभागी भई प्रतिव्यक्ति २० हजार वोन बराबरको किट खरिद गरी सहयोग गर्न कोरियावासी नेपालीहरुलाई एनआरएनएले आग्रह गरेको थियो । कोरियामा उत्पादित किटले कोरोना लागे नलागेको तीन घण्टामा नतिजा दिन्छ । यसको मूल्य प्रतिकिट २० डलर पर्छ ।
किटका लागि कोरियामा रहेको सम्बन्धित कम्पनीसँग सम्झौता भएलगत्तै किट खरिद गर्न नेपालीहरु सक्रिय भएर लागिपरेका थिए ।