काठमाडौं । भ्रष्टाचाररहित सुशासनको माग सहित आन्दोलनमा उत्रिको नयाँ पुस्ता जेन–जीको आन्दोलनका क्रममा भएको भौतिक क्षतिको बीमा दावी बढेर रु २२ अर्ब २५ करोड नाघेको छ । नेपाल बीमा प्राधिकरणले दिएको विवरणअनुसार यस्तो दावी २२ अर्ब २५ करोड ६५ लाख रहेको छ । भदौ २३ को ‘जेन–जी’को प्रदर्शनमा सरकारले दमन गर्न गोली चलाउँदा १९ जना कलिला युवाको ज्यान गएपछि भोलिपल्ट देशभर प्रदर्शन उग्र भएको थियो । त्यस क्रममा सरकारी कार्यालयदेखि नेताहरुको घर र निजी क्षेत्रका उद्योग व्यवसायमा समेत तोडफोड र आगजनी भएको थियो । उक्त आन्दोलनमा भएको क्षतिको दावी दावी अपेक्षाकृत निकै धेरै हुँदा निर्जीवन बीमा कम्पनीहरुलाई सकस भएको छ । सबैभन्दा धेरै दावी द ओरियन्टल इन्स्योरेन्स कम्पनीमा परेको छ । उक्त कम्पनीमा झण्डै रु पाँच अर्ब २३ करोडको दावी परेको छ । सबैभन्दा कम रु. २० करोड ३६ लाख प्रभु इन्स्योरेन्स कम्पनीमा परेको छ । पछिल्लो चरणमा खुलेका माइक्रो इन्स्योरेन्स कम्पनीमा पनि उल्लेख्य दावी परेको छ । सबैभन्दा बढी नेसनल माइक्रो इन्स्योरेन्समा छ करोड ८४ लाखको बीमा दावी परेको छ भने सबैभन्दा कम नेपाल माइक्रो इन्स्योरेन्समा रु ४१ लाखको बीमा दावी परेको छ । यस्तै सम्पत्ति बीमातर्फ रु १८ अर्ब ८१ करोड दावी परेको छ भने मोटर बीमातर्फ रु। दुई अर्ब ६१ करोडको दावी परेको छ ।