काठमाडौं । भनिन्छ जन्म र मृत्यु आफ्नो बसमा हुँदैन । आफ्ना लागि कसैले पनि चिता तयार गर्दैन । तर दुःखद् संयोग चलचित्र विकास बोर्डको अध्यक्ष केशव भट्टराईले भने आफैंले अरुका लागि तयार गर्न लगाएको चितामा जल्नु परेको छ । भट्टराईले एक दिनअघि मात्रै मृत्यु भएका कलाकार दीपक क्षेत्रीको लागि बोर्डको बजेटमा तयार पार्न लगाएको चितामा आफैं जल्नु परेको छ भने कलाकार क्षेत्रीलाई भने अर्को चिता तयार गरी जलाइयो ।
एक दिनको अन्तरमा देहवसान भएका दुई कलाकारको सोमबार एकै साथ राष्ट्रिय सम्मानका साथ अन्त्यष्टि गरियो । दुवै कलाकारको श्रद्धाञ्जलि र अन्त्येष्टिमा कार्यक्रममा कलाकारहरुको बाक्लो उपस्थिति थियो भने सरकारको तर्फबाट सञ्चार तथा सूचना प्रविधि मन्त्री गोकुल बास्कोटाले राष्ट्रिय झण्डा ओढाएर राष्ट्रिय सम्मान प्रकट गरेका थिए ।
यी दुई कलाकारको निधनमा प्रधानमन्त्री केपी शर्मा ओलीले समेत दुःख व्यक्त गर्दै सामाजिक सञ्जालमा शोक व्यक्त गरेका थिए । प्रधानमन्त्री ओलीले सामाजिक सञ्जालमा लेखेका छन्, ‘बितेका दुई दिनमा हामीले प्रतिभावान् दुई कलाकार, केशव भट्टराई र दीपक क्षत्रीलाई गुमायौं । उहाँहरुको कला सधैं हाम्रो स्मृतिमा रहनेछ । हार्दिक श्रद्धाञ्जलि १ शोकाकुल आफन्त र परिवारजनमा गहिरो समवेदना व्यक्त गर्दछु ।’
कलाकारद्वयको निधनप्रति हाम्रो तर्फबाट हार्दिक श्रद्धाञ्जली ।
