काठमाडौं । कोरोना कहरका कारण नेपालमा ज्यान गुमाउनेको संख्या बढ्न थालेको छ । समुदायस्तरमा कोरोनाको प्रकोप देखिएपछि ज्यान गुमाउनेको ग्राफ उकालो लागेको हो । लकडाउनको अन्त्यसँगै कोरोना कहरले समाजमा नराम्रोसँग जरा गाडेको अनुमान गरिएको छ ।
कोरोना भाइरसको संक्रमणका कारण काठमाडौंमा एक जनाको मृत्यु भएको छ ।
बलम्बुस्थित सशस्त्र प्रहरीको अस्पतालमा उपचाररत सर्लाही–६ मलंगवाकी ६५ वर्षीया महिलाको मृत्यु भएको हो । उनलाई मनमोहन अस्पतालबाट १६ गते सशस्त्र प्रहरीको अस्पताल भर्ना भएकी थिइन् । उनलाई निमोनियाका साथै स्क्रब टाइफस समेत देखिएको थियो ।
कोरोना संक्रमण उपत्यका बाहिर झन भयावह बन्दै गएको छ । मोरङमा बुधबार मृत्यु भएका दुई जनामा कोरोना संक्रमण पुष्टि भएको छ । कोशी अस्पताल विराटनगरको आइसोलेसन कक्षमा मृत्यु भएका विराटनगरका पुरुष र अस्पताल ल्याउने क्रममा बाटोमै मृत्यु भएका रंगेली नगरपालिकाका पुरुषमा कोरोना संक्रमण पुष्टि भएको हो । विराटनगर महानगरपालिका– ९ का ४५ वर्षका पुरुष मंगलबार राति अस्पताल भर्ना भएका थिए । उनको बुधबार दिउँसो १ बजे मृत्यु भएको थियो ।
यसैगरी, रंगेली नगरपालिका– ८ दर्बेसाका ४५ वर्षका पुरुषको भने अस्पताल ल्याउने क्रममा बुधबार बिहान साढे १० बजे मृत्यु भएको थियो । कोरोनासँग मिल्ने लक्षण देखिएपछि स्वाब संकलन गरेर कोशीको प्रयोगशालामा परीक्षण गराउँदा संक्रमण पुष्टि भएको हो ।
