काठमाडौं । सबै नेपाली नागरिकको स्वास्थ्य बीमा गर्ने योजना अनुसार अघि बढेको सरकारले चरम गरिबीको सीमाभित्र (अति विपन्न) रहेको नागरिकको निःशुल्क स्वास्थ्य बीमा गरिदिने भएको छ । साढे १६ लाख नागरिक चरम गरिबीको रेखामुनि रहेको बताउँदै त्यस्ता नागरिकको निःशुल्क स्वास्थ्य बीमा गर्ने योजना सरकारका अर्थमन्त्रीले सार्वजनिक गरेका हुन् । आइतबार राष्ट्रिय बीमा संस्थानको वार्षिकोत्सब समारोहमा बोल्दै अर्थमन्त्री डा युवराज खतिवडाले यस्तो घोषणा गरेका हुन् ।
अति विपन्न सबैको प्रिमियम सरकारले नै तिरेर बीमा हुने बताएका छन् । अहिले सरकारले ३५ सय तिरेपछि लाख रुपैयाँसम्मको एक परिवारको स्वास्थ्य बीमा हुने गरेको छ । गरिबीको रेखामुनि रहेका १६ लाखले भने त्यो रकम तिर्नु नपर्ने घोषणा अर्थमन्त्रीले गरेका हुन् ।
अर्थमन्त्री खतिवडाले पछिल्लो समय बीमाको पहुँचमा उल्लेखीय सुधार भएको भन्दै खुसी व्यक्त गरे । बीमा पुहँच बढेर २२ प्रतिशत पुग्नु ज्यादै खुसीको कुरा भएको भन्दै भए पनि यो नै पर्याप्त भने नभएको अर्थमन्त्री खतिवडाले बताए । बीमाको पहुँच २२ प्रतिशत पुगेकोमा अर्थमन्त्री खतिवडाले खुशी व्यक्त गर्नुभएको थियो ।
