एजेन्सी । अहिले विश्व कोरोनाको आतंकबीच गुज्रिरहेको छ । वैज्ञानिकहरु दिनरात कोरोनाविरुद्धको औषधि पत्ता लगाउने अभियानमा छन् । तर अमेरिकी राष्ट्रपति डोनाल्ड ट्रम्पले भने चीनको ल्याबबाट कोरोना भाइरस फैलिएको प्रमाण आफूसँग रहेको बताएका छन् । उनले प्रमाणमात्रै होइन आफूले त्यो कुरा प्रत्यक्ष देखेको दाबीसमेत गरेका छन् । पत्रकार सम्मेलनमा ट्रम्पले चीनको वुहानस्थित इन्सटिच्युट अफ भायरोलोजीमा भएको असावधानीका कारण कोरोना भाइरसको संक्रमण विश्वभर फैलिएको दाबी गर्दै आएका बेला यस्तो ठोकूवा गरेका हुन् ।
बिहीबार रातिको पत्रकार सम्मेलनमा राष्ट्रपति ट्रम्पले यस्तो दाबी गरेका हुन् ।
उनले चीनले कोरोना भाइरस फैलाउने काम जानीजानी गर्‍यो कि गल्तीका कारण भयो भन्नेबारे भने स्पष्ट नभएको बताएका छन् । यसैगरी ट्रम्पले विश्व स्वास्थ्य संगठन (डब्ल्युएचओ)ले चीनको पक्षपोषण गरेको आरोप लगाए । उनले यसमा डब्ल्यूएचओलाई लाज लाग्नुपर्ने टिप्पणी समेत गरे ।