काठमाडौं । एक वर्षसम्म प्रदेश सरकारको सेवा गरेका सचिवहरु (सहचिव) लाई सिंहदरबारमा तानिएको छ भने सिंहदरबारका विभिन्न मन्त्रालय तथा निकायहरुमा कार्यरत वरिष्ठ सहसचिवहरुलाई प्रदेश मन्त्रालयका सचिवमा काज सरुवा गरिएको छ । संघीय मामिला तथा सामान्य प्रशासन मन्त्रालयले मंगलबार विभिन्न मन्त्रालयका प्राविधिक तथा प्रशासनिक तर्फका वरिष्ठ सहसचिवहरुलाई प्रदेशमा सरुवा गर्ने निर्णय गरेकोमा आज सो निर्णय सार्वजनिक भएको हो ।

प्रदेशमा कामको प्रभावकारिता बढाउन विभिन्न शक्तिशाली मन्त्रालयमा रहेका अनुभवी सहसचिवलाई प्रदेशमा खटाउने गरी यो निर्णय आएको बताइएको छ । अहिलेको सरुवा वरिष्ठताको आधारमा मात्र गरिएको मन्त्रालय स्रोतले जानकारी दिएको छ । सरुवा हुने सहसचिवमा प्रधानमन्त्री कार्यालयदेखि गृह मन्त्रालयसम्मका छन्। यसअघि प्रदेशमा कनिष्ठ सहसचिव मात्र जाने गरेका थिए । वरिष्ठ सहसचिवहरु भने सिंहदरबारमै रजगज गर्ने अघोषित परम्परा नै बनेको थियो । विगतको चेन तोड्दै मन्त्रालयबाट भएको यो निर्णयलाई कर्मचारी प्रशासनका एक जानकारले साहसिक निर्णय समेत भनेका छन् ।