काठमाडौं । कोरोना संक्रमणले विश्वलाई नै आतंकित बनाउँदा आम जनमानसमा अन्योल त्रास फैलिएको छ । सामान्य रुघाखोकी र भाइरल ज्वरोमा पनि मान्छे आत्तिने र स्वास्थ्य संस्थामा भीडभाड गर्ने अवस्था आएको बेला नेपाल चिकित्सक संघले कोरोना भाइरस संक्रमणसँग सम्बन्धित परामर्श सर्वसाधारणलाई टेलिफोनबाटै उपलब्ध गराउने भएको छ । सरकारले आम नागरिकलाई आकस्मिक स्वास्थ्य समस्याबाहेक अस्पताल र भीडभाड हुने ठाउँमा नजान आग्रह गरेका बेला चिकित्सक संघले टेलिफोनबाटै कोरोना भाइरससँग सम्बन्धित परामर्श दिन लागेको हो । त्यसका लागि संघले १३ जना विशेषज्ञ चिकित्सकको टेलिफोन नम्बर सार्वजनिक गरेको हो । संघका अनुसार तोकिएको निश्चित समयमा सर्वसाधारणले ती विशेषज्ञ चिकित्सकलाई फोन गरी कोरोना भाइरस संक्रमणसँग सम्बन्धित समस्याबारे परामर्श लिन सक्नेछन् ।