काठमाडौं । काठमाडौंको दक्षिणकाली चाल्नाखेल जंगलमा भेटिएका शवहरुको पहिचान भएको छ। तीमध्ये एक जना कक्षा दशमा पढ्दै गरेका १६ वर्षीय अर्जुन खड्का र १७ वर्षीय मंगल तामाङ रहेको प्रहरीले जनाएको छ । तर उनीहरुको आत्महत्या हो वा हत्या भन्ने अझै खुलेको छैन । अर्जुन खड्का नुवाकोटका हुन् भने मंगल तामाङ काभ्रेपलाञ्चोकका। बाङ्गेमुडामा बस्दै आएका उनीहरु हिजो खाना खाएर साथीको घर ललितपुर जाने भन्दै हिँडेका थिए। घटनास्थलमा प्रहरीले दुईवटा विषादीको बट्टा पनि भेटेकाले आत्महत्या हुनसक्ने प्रारम्भिक अनुमान छ। घटनास्थलमा विषको बट्टा भेटिएको छ। पोस्टमार्टम पछिमात्र यकिन के हो भन्न सकिने महानगरीय प्रहरी परिसरका एसपी रमेशकुमार बस्नेतले बताएका छन् । दक्षिणकाली नगरपालिकाको चाल्नाखेल जंगलमा दुई जनाको शव भेटिएको थियो। एक जनाको खोल्सामा र एक जनाको डिलमा शव भेटिएपछि प्रहरी अनुसन्धानका लागि जुटेको थियो। प्रहरीले घटनास्थल घेराबन्दी गरेर अनुसन्धान अगाडि बढाएको हो। अनुसन्धानका लागि दुई वटा कुकुर समेत परिचालन गरिएको छ।