काठमाडौं । असोज ३१ गते, शुक्रबार, नेपाली बजारमा सुन र चाँदीको मूल्य बढेर रेकर्ड ब्रेक गरेको छ । यस दिन सुनको मूल्य प्रतितोला ७ हजार १०० रुपैयाँले बढेर रेकर्ड ब्रेक गरेको हो । नेपाल सुनचाँदी व्यवसायी महासंघका अनुसार आज छापावाल सुन प्रतितोला २ लाख ५८ हजार रुपैयाँमा कारोबार भइरहेको छ । सो मूल्य हालसम्मको उच्च हो । बिहीबारको बजारमा छापावाल सुन प्रतितोला २ लाख ५० हजार ९०० रुपैयाँमा कारोबार भएको थियो । सो मूल्यलाई ब्रेक गर्दै आज सुनको मूल्यले नयाँ उचाई बनाएको हो । पछिल्ला दिन सुनको मूल्यले निरन्तरको रेकर्ड ब्रेक गर्दै बढेको हो । यस दिन चाँदीको मूल्य पनि तोलामा ७५ रुपैयाँले बढेर रेकर्ड ब्रेक गरेको छ । शुक्रबारको बजारमा चाँदी प्रतितोला तीन हजार ३५० रुपैयाँमा खरिदबिक्री भइरहेको छ । असोज २८ कायम चाँदी तोलाको तीन हजार ३२५ रुपैयाँको उचाईलाई ब्रेक गर्दै नयाँ उचाई बनाएको हो । बिहीबारको बजारमा चाँदी प्रतितोला तीन हजार २७५ रुपैयाँमा खरिदबिक्री भएको थियो ।