नायिका जेनी कुँवरले बिहीबार बेलुकी आफ्नै अपार्टमेण्टमा पासो लगाएर मृत्युवरण गरेकी छन् । नयाँ बानेश्वर थापागाउँ नजिकैको सनराइज सिटी अपार्टमेण्टमा भुण्डिएको अवस्थामा कुँवर फेला परेकी हुन् । सुसाईड नोटसमेत सँगै रहेको हुँदा आत्महत्या गरेको हुनसक्ने प्रहरीले आँकलन गरेको छ । उनको शव अपार्टमेण्टको किचेनमा भुण्डिएको अवस्थामा फेला परेको हो । पछिल्लो समय पशुपतिनाथको मन्दिर र कैलाशको जंगलतिर धेरै देखिन थालिएकी उनी अध्यात्मतिर लागेको बताउँथिन् । सन्यासीको भूमिकामा उनले धेरै वटा युट्युब फिल्ममा खेलेको पाइन्छ । आधा दर्जन जति चलचित्रमा अभिनय गरेकी कुँवर विवाहित भए पनि श्रीमानसँग पारपाचुके गरिसकेकी थिइन् । उनी धेरै पटक विवादमा समेत आएकी थिइन् । पछिल्लो समय उनी डिप्रेशनमा रहेको उनी निकटस्थहरुले बताएका थिए ।