काठमाडौं । १२० दिन लामो पट्यारलाग्दो लकडाउनको दोस्रो शृङ्खलालाई पनि उस्तै पट्यारलाग्दो बनाउन लागिएको छ । अघिल्लो लकडाउनले थिलथिलो भएको अर्थतन्त्रलाई मुन्टै उठाउन नदिने गरी फेरि शुरु गरिएको निषेधाज्ञालाई थप गर्ने तयारीमा राजधानी काठमाडौंका तीन जिल्लाका प्रमुख जिल्ला अधिकारी पुगेका छन् ।
काठमाडौं उपत्यकामा लागू गरिएको निषेधाज्ञा बुधवार मध्यरातबाट सकिँदै छ ।
निषेधाज्ञाको समय सकिनुअघि मंगलबार दिउँसो उपत्यकाका प्रमुख जिल्ला अधिकारीहरु जनकराज दाहाल, हुमकला पाण्डे र नारायण प्रसाद भट्ट बैठकमा बस्दै छन् । बैठक बस्नुको मुख्य एजेन्डा जारी निषेधाज्ञालाई अर्को एक साता लम्ब्याउनु रहेको छ । निषेधाज्ञाको समय सकिनुअघि बस्ने बैठकले आगामी नयाँ रणनीति बनाउँदै उद्योग धन्दालाई केही सहज बनाउने बताइएको छ ।
प्रमुख जिल्ला अधिकारीहरुको बैठकमा निषेधाज्ञाको कार्यान्वय अवस्था समीक्षा गर्ने र भावी रणनिती तय गरिने काठमाडौंका प्रमुख जिल्ला अधिकारी जनकराज दाहालले बताएका छन् । आवागमन बन्द गरेपछि भीडभाड कम भएको र त्यसबाट उपत्यकामा संक्रमणको दर घटेको स्थानीय प्रशासनको निष्कर्ष रहे पनि सरकारले परीक्षणको दायरा नबढाउँदा राजधानीमा आतंक उस्तै छ । प्रमुख जिल्ला अधिकारीहरुले अहिलेकै मोडलको निषेधाज्ञालाई थप एक साता बढाउने तयारी गरेका छन् । सोमबार उपत्यकाका स्थानीय प्रशासनले निषेधाज्ञाको प्रारम्भिक समीक्षा गरेका थिए । सो बैठकमा अहिलेकै निषेधाज्ञाको स्वरुपलाई निरन्तरता दिनुपर्ने कुरा उठेको थियो । प्रमुख जिल्ला अधिकारीहरुले उपत्यकाका महानगरपालिका र नगरपालिकाका प्रमुखसँग पनि यसबारे छलफल गर्दैछन् । स्थानीय निकायका जनप्रतिनिधिहरु पनि जारी निषेधाज्ञालाई अझै लम्ब्याउने पक्षमा रहेका छन् ।
