काठमाडौं । आइएमई नेपाल साहित्य महोत्सवको आठौं संस्करण पोखरामा सुरु भएको छ । फेवातालको किनारमा आइएमई नेपाल साहित्य महोत्सवको तालबाराही चोक, लेकसाइड पोखरामा गण्डकी प्रदेशका मुख्यमन्त्री पृथ्वीसुब्बा गुरुङले महोत्सव उद्घाटन गरे । कार्यक्रममा गुरुङले नेपाल मात्र नभई एसियाकै महत्वपूर्ण एवम् भव्य महोत्सव आयोजना हुनु गण्डकी प्रदेशका लागि गौरवको विषय भएको बताए ।
यसैगरी कार्यक्रममा आइएमई ग्रुपका अध्यक्ष चन्द्रप्रसाद ढकालले लेखक, पत्रकार, समीक्षक आदिको भव्य सहभागिता रहने महोत्सव प्रायोजन गर्न पाएकोमा आफूहरुलाई खुसी लागेको धारणा राखे । मानिसले साहित्य, कला, संगीत आदिबारे चासो राख्ने र त्यही सर्वसाधारणको चासो सम्बोधन गर्ने काममा आइएमई लागिपरेको उनको भनाइ छ ।