काठमाडौं । ब्राजिलका स्टार फरवार्ड नेयमारले अन्तर्राष्ट्रिय फुटबलबाट सन्यासको घोषणा गरेका छन्। फिफा विश्वकप २०२६ को अन्तिम १६ मा नर्वेसँग २–१ को पराजय भोग्दै ब्राजिल प्रतियोगिताबाट बाहिरिएपछि उनले राष्ट्रिय टोलीसँगको १६ वर्ष लामो यात्रालाई पूर्णविराम दिएका हुन्।
३४ वर्षीय नेयमारले खेलपछि भावुक हुँदै ब्राजिलका लागि आफ्नो यात्रा यहीँ समाप्त भएको बताए। न्यु जर्सीमा भएको खेलमा नर्वेका स्टार एर्लिङ हालान्डले दुई गोल गर्दै आफ्नो टोलीलाई ऐतिहासिक जित दिलाए। नेयमारले इन्जुरी समयमा पेनाल्टीमार्फत एक गोल फर्काए पनि त्यो ब्राजिलको हार टार्न पर्याप्त भएन।
विश्वकपअघि नै चोटग्रस्त बनेका नेयमारले ब्राजिलका सुरुआती खेल गुमाएका थिए। त्यसपछि प्रशिक्षक कार्लो एन्सेलोटीको योजनाअनुसार उनी बिस्तारै टोलीमा फर्किए पनि अधिकांश खेलमा वैकल्पिक खेलाडीका रूपमा मैदान उत्रिनुपरेको थियो।
स्कटल्यान्ड र नर्वेविरुद्ध उनी बेन्चबाट मैदान प्रवेश गरेका थिए। ब्राजिलका लागि उनको अन्तिम अन्तर्राष्ट्रिय गोल नर्वेविरुद्ध इन्जुरी समयमा पेनाल्टीमार्फत आयो।
सन् २०१० मा राष्ट्रिय टोलीबाट डेब्यु गरेका नेयमारले ब्राजिलका लागि १२९ अन्तर्राष्ट्रिय खेल खेल्दै ८० गोल गरेका छन्। यससँगै उनी ब्राजिलका पुरुष फुटबलतर्फ सर्वाधिक गोलकर्ता बने।
उनले चार संस्करणको फिफा विश्वकप खेले पनि विश्वकप उपाधि जित्ने सपना भने पूरा हुन सकेन। यद्यपि सन् २०१३ मा उनले ब्राजिललाई फिफा कन्फेडेरेसन कप जिताएका थिए भने कप्तानका रूपमा सन् २०१६ को रियो ओलम्पिकमा ब्राजिललाई पहिलो पटक स्वर्ण पदक दिलाएका थिए। यसअघि सन् २०१२ को लन्डन ओलम्पिकमा उनले रजत पदक पनि जितेका थिए।
नेयमारको अन्तर्राष्ट्रिय करियरमा बारम्बार लागेको चोट सबैभन्दा ठूलो चुनौती बन्यो। महत्त्वपूर्ण प्रतियोगिताहरूमा पटक–पटक घाइते भए पनि उनी लामो समयसम्म ब्राजिलको आक्रमणको केन्द्रबिन्दु बने।
नर्वेविरुद्धको हारसँगै अन्तिम सिटी बज्नेबित्तिकै नेयमार केहीबेर मैदानमै निश्चल उभिए। त्यसपछि उनी भावुक बनेर आँसु झार्न थाले, जबकि टोलीका खेलाडीहरूले उनलाई अँगालो हालेर सान्त्वना दिएका थिए।
यससँगै प्रशिक्षक कार्लो एन्सेलोटीको नेतृत्वमा ब्राजिलको विश्वकप यात्रा पनि समाप्त भएको छ भने नेयमारले राष्ट्रिय टोलीसँगको आफ्नो गौरवपूर्ण अध्याय आँसुसँगै समापन गरेका छन्।
