काठमाडौं । नेशनल लाईफ इन्स्योरेन्स कम्पनीले चौथो त्रैमासको वित्तीय विवरण सार्वजनिक गरेको छ । कम्पनीका सबै सूचांकहरु सकारात्मक देखिएका छन् । गत आवमा कम्पनीले कूल बीमा शुल्क आर्जन ९ अर्ब २२ करोड ६ लाख १४ हजार ४३ रुपैयाँ गरेको छ भने खुद बीमा शुल्क आर्जन ९ अर्ब ११ करोड ४० लाख ७९ हजार ९३६ रुपैयाँ छ । अघिल्लो आवमा कम्पनीको कूल बीमा शुल्क एक अर्ब २० करोड रुपैयाँ बृद्धि गर्न सफल भएको छ । त्यस्तै खुद बीमा शुल्क १६ प्रतिशतले बृद्धि गर्न सफल भएको देखिएको छ । कम्पनीले अघिल्लो आवमा सात अर्ब ८० करोड दुई लाख ४६ हजार ६९४ रुपैयाँ आर्जन गरेको थियो । कम्पनीको जीवन बीमा कोष ६ अर्ब भन्दा बढिले बृद्धि भएको छ । अघिल्लो आवमा २७ अर्ब १९ करोड आठ लाख ३२ हजार ७९२ रुपैयाँ रहेको कोषमा गत असार मसान्त सम्ममा ३३ अर्ब ७२ करोड १६ लाख १० हजार ७३४ रुपैयाँ जम्मा गरेको छ । कम्पनीले जगेडा कोषमा एक अर्ब तीन करोड ६१ लाख ८१ हजार ७७२ रुपैयाँ जम्मा गरेको छ भने महाविपत्ति कोषमा २७ करोड ८९ लाख २४ हजार ४५८ रुपैयाँ जम्मा गरेको छ । उल्लेखित थप कोष सहित नेशनल लाईफको कूल कोषको आकार ३५ अर्ब तीन करोड ६७ लाख १६ हजार ९६४ रुपैयाँ जम्मा गरेको छ ।
कम्पनीको मुनाफामा बृद्धि भएको छ । अघिल्लो आवमा जम्मा ३३ करोड मुनाफा गरेको कम्पनीले गत आवमा ३९ करोड १२ लाख २९ हजार १३८ रुपैयाँ मुनाफा बृद्धि गर्न सफल भएको हो । यद्यपि जीवन बीमा कम्पनीहरुको बीमाङ्कीय मूल्याङ्कनपछि मुनाफामा हेरफेर हुनेछ ।