एजेन्सी । अमेरिकाको न्युयोर्क सहरमा कोरोना भाइरसको संक्रमणमा ४५ वर्षमुनिका व्यक्ति धेरै देखिएका छन् । वृद्धवृद्धा र बालबालिकाको रोग प्रतिरोधी क्षमता कम हुने भएका कारण उनीहरु बढी जोखिममा मानिए पनि न्यूयोर्कमा भने युवाहरु नै बढी जोखिममा देखिएका छन् । एनवाईसी हेल्थ डिपार्टमेन्टका अनुसार, संक्रमितमध्ये झण्डै आधा मानिस ४५ वर्षमुनिका छन् । यसमा पनि पुरुष बढी छन् । कुल १५ हजार ५ सय ९७ संक्रमितमध्ये ५६ प्रतिशत त पुरुष नै छन् । कोरोना संक्रमणबाट ज्यान गुमाइरहेकामध्ये पनि पुरुष धेरै छन् । हालसम्म ज्यान गुमाएका मध्ये ६१ प्रतिशत पुरुष रहेको हेल्थ डिपार्टमेन्टले जनाएको छ । सीएनबीसीका अनुसार, न्युयोर्क सहरका १८ देखि ४४ वर्षका ४६ प्रतिशत मानिस कोरोनासँग जुधिरहेका छन् । ४५ देखि ६४ वर्ष उमेर समूहका ३३ प्रतिशत मानिसमा पनि कोरोना देखिएको छ । त्यस्तै, ६५ देखि ७४ सम्मका ११ र ७५ भन्दा माथिका ८ प्रतिशत व्यक्तिमा कोरोना भाइरसको संक्रमण भएको छ । न्युयोर्क स्टेटको न्युयोर्क सहर कोरोनाको सबैभन्दा बढी चपेटामा परिरहेको छ । हाल न्युयोर्क राज्यभर ३० हजार ८ सय ११ मानिसमा कोरोना पुष्टि भएको छ । यीमध्ये १७ हजार ८ सय ५६ त न्युयोर्क सहरकै छन् । हरेक तीन दिनमा यहाँको संक्रमण दोब्बरले बढिरहेको त्यहाँका सरकारी अधिकारीलाई उद्धृत गर्दै सीएनबीसी डटकमले जनाएको छ । अमेरिकी राष्ट्रपति ट्रम्पले हटस्पट भएको जनाएका छन् । (एजेन्सी)
