काठमाडौं । पत्रकार तथा निर्देशक गणेश पाण्डेले चर्चित डकुमेन्ट्री भाग्यले बाँचेकाहरुको सफलतापछि ‘सहायक श्रीमान’ नामक नयाँ डकुमेन्ट्री निर्माण गरेका छन् । कर्णाली प्रदेशको हुम्लामा छायाँकन गरिएको यो डकुमेन्ट्री बहुपति प्रथामा आधारित छ । घरमा जति दाजुभाई छन्, एउटै श्रीमती बिहे गर्ने संसारकै अनौठो चलन अहिले पनि नेपालका कतिपय हिमाली जिल्लामा विद्यमान छ । सोही विषयलाई निर्देशक पाण्डेले कलात्मक ढंगले पर्दामा उतारेका छन् । बहुपति प्रथामा आधारित डकुमेन्ट्री शुक्रबार रिलिज भयो ।
करिब ४ बर्षको छायांकन र रिसर्चबाट यो डकुमेन्ट्री निर्माण भएको दाबी निर्देशक पाण्डेले गरेका छन् । हाम्रो पुस्ताका लागि यो डकुमेन्ट्री नयाँ विषय हो । डकुमेन्ट्रीको प्रमुख सहायक निर्देशक एवं दृश्य सम्पादक ईश्वर कोइराला र सहायक निर्देशक नृपराज हमाल छन् भने ईश्वर कोइराला, चन्द्रमान डंगोल, अविनाश लामा र राधेश्याम तिमिल्सिनाले यो डकुमेन्ट्रीलाई क्यामरामा कैद गरेका हुन् । संगीत संयोजन संगीतकार जुगल डंगोलले गरेका छन् । बृत्तचित्रलाई साइन मिडिया प्रालिका लागि शारदा गैरेले निर्माण गररेका हुन् ।