अन्ततः समय, खर्च र सहजताको हिसावले सम्माननीय प्रधानमन्त्रीको मिर्गौला प्रत्यारोपण नेपालमै हुने भएको छ । त्यसका लागि नातेदारहरूले मिर्गौला दिन कबुल गरिसकेका छन् । प्रत्यारोपणको समय पनि टुंगो लागेको छ, पुसको अन्तिम साता । तर, प्रत्यारोपण गर्नका लागि चाहिने स्वास्थ्यस्थितिका न्युनतम शर्त पूरा नभएको अवस्थामा समय सर्न पनि सक्ने उपचारमा संलग्न एक चिकित्सकले जनआस्थालाई बताए ।
यसरी प्रत्यारोपणपछि कम्तिमा तीन महिनासम्म आराम गर्नुपर्ने बताइएको छ । त्यस अवधीमा सरकार वा पार्टीको पूर्ण जिम्मेवारी कसलाई दिने ? यसबारे केही दिनमै निर्णय हुने बालुवाटारस्रोतले जनाएको छ । प्रधानमन्त्री सक्रिय जीवनको पक्षमा भएको कुरा आइतबार उहाँसमेतको नाम जोडिएको प्रतिवेदन आएबाट बुझिन्छ । अहिलेको सरकारमा वरिष्ठतम् उपप्रधानमन्त्री ईश्वर पोखरेलप्रति उहाँको सरकार गठन गर्दैैदेखि सफ्टकर्नर थिएन । शुरुमा दिनै परे बिना विभागीय मन्त्रीसम्म राख्ने सोच थियो ।
पछि राष्ट्रपतिको जोडबलमा रक्षासहित उपप्रधानमन्त्रीको जिम्मेवारी तोकिएको हो । केही बुद्धिजीवीमार्फत कुरा बाहिर आएका छन्– राष्ट्रपतिलाई केही कार्यकारी अधिकार प्रत्यायोजन गरेर प्रमले आराम गर्ने । प्रचण्डले पनि ०६४ मा कार्यकारी राष्ट्रपतिको एजेण्डा बोकेरै चुनाव लड्नुभएको थियो । नेपालमा बेलायती मोडलको संसदीय प्रणाली छ । यदि त्यसो गरियो भने कांग्रेस सभापति शेरबहादुर देउवाले पनि रोक्नसक्ने अवस्था देखिँदैन । किनभने, नेपाल वायुसेवा निगमको विवादास्पद वाइडबडी जहाज खरिदमा उहाँको संलग्नताका प्रमाणित आधारहरू छन् । त्यसैले विपक्षीले त्यस्तो कामलाई चुनौति दिनसक्ने सम्भावना छैन । यसबारे भित्र के पाक्दैछ, अहिलेसम्म सतहमा प्रकट भएको छैन ।
बुधबार प्रकाशित जनआस्था साप्ताहिकबाट साभार
