काठमाडौं । डिफेन्डिङ च्याम्पियन नेपालले भुटानलाई हराउँदै १३औं दक्षिण एसियाली खेलकुद (साग) अन्तरगतको पुरुष फुटबलको स्वर्ण उपाधि नेपालले हातपारेको छ । साग फुटबलमा लगातार दोस्रो पटक उपाधि जितेको नेपालका लागि यो चौथो उपाधि हो । आज दशरथरंगशालामा भरिभराउ दर्शकबीच भएको फाइनल खेलमा नेपालले भुटानलाई २–१ गोल अन्तरले उपाधि आफ्नो कब्जामा पार्न सफल भएको हो ।
त्रिपुरेश्वरस्थित दशरथ रंगशालामा भएको खेलमा नेपालले १७औं मिनेटमा अभिषेक रिजालको गोलबाट अग्रता लिएको थियो । तर ३७ औं मिनेटमा भुटानका खेलाडी चेन्चो ग्याल्सेनले बराबरी गोल गर्दै खेललाई थप दबावमा ल्याएका थिए ।
खेलको दोस्रो हाफमा सुनिल बलको गोलबाट नेपालले फेरि अग्रता लियो । सुनिलको उत्कृष्ट हेडलाई भुटानी गोलकिपरले बचाउन सकेनन् ।

तस्बिर : खेलपाटीबाट