भक्तपुर । मान्छेले अपराध गर्छ र त्यसलाई लुकाउन हरप्रयास गर्छ । तर अपराध कुनै न कुनै दिन पोखिन्छ नै । कुनै न कुनै दिन अपराधकाे पाेकाे खुल्छ । अपराधी जतिसुकै चलाख भए पनि अपराध लुक्न सक्दैन ।
यस्तै भएको छ भक्तपुरमा भएको एउटा बलात्कारको घटनामा पनि रामेछाप खाँडादेवी गाउँपालिका–९ स्थायी घर भएका २२ वर्षीय राजेश भन्ने सुरेश भण्डारीले मध्यपुरथिमिमा रहेको आफ्नो मासु पसलमा पत्रिकाको ग्राहक बनाउन आएकी किशोरीलाई २०७६ जेठ २७ गते पत्रिकाको ग्राहक बनिदिन्छु पैसा कोठामा छ, भन्दै फकाई डेरामा लगेर जबरजस्ती करणी गरेका थिए ।
महानगरीय प्रहरी परिसर भक्तपुरका सूचना अधिकारी प्रहरी नायब उपरीक्षक दिपक गिरीका अनुसार भण्डारीले ती किशोरीलाई बलात्कार गरेपछि कोही कसैलाई भने मारी दिन्छु भनेर धाकधम्की दिएको बताइएको छ ।
पीडित किशोरीले जबरजस्ती करणी गरेको कुरा कोही कसैलाई भन्न नसकी चुपचाप बसेको र गर्भवती भई २०७६ माघ २६ गते बालकलाई जन्म दिइन् । २०७७ असार १४ गते जबरजस्ती करणी मुद्दामा पीडित किशोरीले जाहेरी दरखास्त दिएपछि प्रहरीले भण्डारीलाई पक्राउ गरेको हो ।
जबरजस्ती करणी मुद्दाको कसुर बमोजिम एक बर्षे हद म्याद भएता पनि कोभिड–१९ संक्रमणको कारण देशभर बन्दाबन्दी भएकाले भण्डारीलाई खोजतलास गर्दै जाँदा मंगलबार मात्रै पक्राउ गरिएको हो । पक्राउ परेका भण्डारीलाई जिल्ला अदालत भक्तपुर पेश गरेकोमा ७ दिन म्याद थप गरी अनुसन्धान कार्य भईरहेको प्रहरीले जानकारी दिएको छ ।
