काठमाडौं । बाणिज्य, आपूर्ति तथा उपभोक्ता संरक्षण विभागले पछिल्ला दिनमा बजार अनुगमनलाई आक्रामक बनाएको छ । खाद्य वस्तुको गुणस्तर, नापतौल, उपभोग्य अवधि लगायतका विषयलाई ध्यान दिएर उपत्यकामा बजार अनुगमनलाई तिव्र बनाएको हो । विभागको महानिर्देशकमा राजन पौडेललाई पठाएपछि उनले बजार अनुगमनको नेतृत्व लिने अनुगमन शाखाको प्रमुखमा राकेश पाण्डेलाई नियुक्त गरेपछि अनुगमन कार्यले तिव्रता पाएको हो । यसअघिका निर्देशकका पालामा बजार अनुगमनका नाममा झारा टार्ने काम मात्रै भएको उपभोक्ताहरुले महसुस गरेका थिए । यतिबेला बजार अनुगमनलाई यति तीव्र बनाइएको छ कि, साउन ३१ गते बिहीबारका दिन मात्रै ३१ वटा फर्महरुमाथि अनुगमन गरी सामान्य चेतावनी देखि लाखौंको जरिवाना समेत गराइएको छ । बिहीबार विभाग स्रोतले दिएको जानकारीअनुसार प्रजापति स्टोर्स एन्ड सप्लायर्स भक्तपुरलाई ५० हजार, भगवती मसला कम्पनीलाई ३ लाख, इन्द्रायणी मेरो अटो प्रालिलाई ५० हजार, आरए हाम्रो स्टोरलाई १० हजार जरिवाना गराइएको छ । त्यसमध्ये प्रजापति र भगवतलाई लगाइएको जरिवाना असुल समेत भइसकेको छ । त्यस्तै निखिल अटो कार, दिनेश इलेक्ट्रोनिक्स कार क्राफ्टलाई समेत कागजात सहित विभागमा उपस्थित हुन निर्देशन दिइएको छ । यी घटना त उदाहण मात्रै हुन् । विभागले दैनिक रुपमा बजार अनुगमन गरेर कैफियत देखिएकाहरुलाई कारबाही गर्ने प्रक्रियालाई तिव्रता दिएपछि उपभोक्ताले पनि राहत महसुस गर्न थालेका छन् । त्यसैगरी साउन ३० गते बुधबार संखमुल, न्यूरोड, पेप्सिकोला, जावलाखेल, पुल्चोकमा बजार अनुगमन गरी विभिन्न फर्महरुबाट ५० हजारदेखि दुई लाखसम्मको जरिवाना समेत उठाइएको छ । त्यसैगरी साउन २९ गते ६ वटा फर्ममा, साउन २८ गते १० वटा फर्ममा, साउन २७ गते १९ वटा फर्ममा बजार अनुगमन गरिएको थियो । त्यसमा रेडिमेड कपडा बिक्री वितरण गर्ने फर्मदेखि लिएर गाडीका पार्टपूर्जा बेच्ने फर्मसम्म बाणिज्यको अनुगमनमा परेका थिए । विभिन्न पानी उद्योगहरुले प्रशोधित पानी उत्पादन तथा संकलन गरी बिक्री वितरण गरिरहेका तर सोको मूल्यमा एकरुपता नपाएपछि विभागले बोतलको पानी १६ रुपैयाँ र जारको पानी ४७ रुपैयाँभन्दा बढी लिन नपाउने व्यवस्था गरेको छ ।
उद्योग, बाणिज्य तथा आपूर्ति मन्त्री दामोदर भण्डारीको कालो बजार नियन्त्रण गरी बजारमा सुशासन कायम गर्ने स्पष्ट प्रतिबद्धता रहेको र विभागलाई समेत सोही किसिमको निर्देशन भएका कारण विभागले पछिल्ला दिनमा बजार अनुगमलाई तिव्रता दिएको हो । विभागको नेतृत्वको सक्रियता र अनुगमन शाखाका निर्देशकको क्रियाशीलताका कारणले नै दैनिक दर्जन भन्दा बढी स्थानमा स्थलगत अनुमगन हुने गरेको छ । प्रत्येक दिन विभागले अनुगमनका लागि कार्यालय समय शुरु भएलगत्तै कार्यतालिका बनाउने र छुट्टा छुट्टै टोली अनुगमनमा पठाउने गरेको छ । कार्यालय समय रहुञ्जेल अनुगमनमै रहेन टोलीका सदस्यहरुले अनिवार्य रुपमा दैनिक कार्यालय समय सकिए पनि विभागमा उपस्थित भएर लिखित अनुगमन प्रतिवेदन बुझाउनु पर्ने र सोही प्रतिवेदनका आधारमा विभागले दैनिक बजार अनुगमन सम्बन्धी जानकारी विभिन्न माध्यमबाट गराउँदै आएको छ ।