काठमाडौं । रसुवाको भोटेकोशी नदीमा आएको विनाशकारी बाढीका कारण बैंकिङ क्षेत्र पनि गम्भीर रूपमा प्रभावित भएको छ। बाढीले रसुवाका विभिन्न क्षेत्रमा सञ्चालनमा रहेका बैंकका शाखा कार्यालयमा क्षति पुर्याउनुका साथै त्यहाँ कार्यरत कर्मचारीसमेत सम्पर्कविहीन भएका छन्।
नेपाल बैंकर्स संघका अनुसार पछिल्लो विवरणमा ८ वटा वाणिज्य बैंकका २६ कर्मचारीसँग सम्पर्क हुन सकेको छैन। सञ्चार सेवा, विद्युत् तथा सडक सम्पर्क अवरुद्ध भएकाले कर्मचारीको अवस्थाबारे तत्काल यकिन गर्न कठिनाइ भइरहेको संघले जनाएको छ।
बाढीबाट प्रभावित बैंकहरूमा प्रभु बैंक, ग्लोबल आइएमई बैंक, सानिमा बैंक, नेपाल इन्भेस्टमेन्ट मेगा बैंक, लक्ष्मी सनराइज बैंक, एनएमबी बैंक र माछापुच्छ्रे बैंकलगायत रहेका छन्। पछिल्लो विवरणअनुसार नबिल बैंकका सबै कर्मचारी सम्पर्कमा आएका छन् भने अन्य बैंकका कर्मचारीसँग पनि क्रमशः सम्पर्क स्थापित भइरहेको बैंकर्स संघले जनाएको छ।
प्रारम्भिक विवरणमा रसुवामा नौ वटा वाणिज्य बैंकका शाखा प्रभावित भएको उल्लेख गरिएको थियो। तीमध्ये माछापुच्छ्रे, नबिल, सानिमा, लक्ष्मी सनराइज, हिमालयन, प्रभु, ग्लोबल आइएमई, नेपाल इन्भेस्टमेन्ट मेगा र एनएमबी बैंकका शाखा रहेका थिए। केही शाखा बाढीले पूर्ण रूपमा बगाएको तथा केहीमा ठूलो भौतिक क्षति पुगेको बताइएको छ।
हालसम्म सार्वजनिक गरिएको आधिकारिक विवरणमा प्रत्येक बैंकका कर्मचारीको छुट्टाछुट्टै संख्या स्पष्ट गरिएको छैन। बैंकर्स संघले समग्रमा ८ बैंकका २६ कर्मचारी सम्पर्कविहीन रहेको जानकारी दिएको छ। कर्मचारीहरू क्रमशः सम्पर्कमा आउने क्रम जारी रहेकाले बैंकअनुसारको संख्या परिवर्तन हुन सक्ने देखिन्छ।
यसैबीच, बाढीले बैंकका शाखा कार्यालय मात्र नभई टेलिफोन तथा इन्टरनेटका टावर, सडक र पुलसमेत क्षतिग्रस्त बनाएकाले बैंकहरूलाई आफ्ना कर्मचारी तथा शाखाको वास्तविक अवस्था पत्ता लगाउन समस्या भएको छ। बैंकर्स संघका अनुसार प्रभावित क्षेत्रमा तत्काल पुग्नसमेत कठिन अवस्था रहेकाले क्षतिको विस्तृत विवरण संकलन गर्न समय लाग्नेछ।
बाढीको चपेटामा बैंकिङ पूर्वाधार परेपछि प्रभावित क्षेत्रमा नियमित बैंकिङ सेवा सञ्चालनमा समेत चुनौती देखिएको छ। नेपाल बैंकर्स संघले भने प्रभावित क्षेत्रमा सकेसम्म बैंकिङ सेवा निरन्तर राख्ने प्रयास गरिने जनाएको छ।
यस विपत्तिमा बैंकका कर्मचारी मात्र होइन, रसुवा भन्सार, जलविद्युत् आयोजना, सुरक्षा निकाय तथा विभिन्न क्षेत्रमा कार्यरत सयौँ मानिससमेत सम्पर्कविहीन भएका छन्। नेपाल प्रहरीका अनुसार उद्धार तथा खोजी कार्यलाई प्राथमिकतामा राखेर प्रभावित क्षेत्रमा विभिन्न टोली परिचालन गरिएको छ।
