काठमाडौं । कोरोना संक्रमण डरलाग्दो गरी फैलिएपछि प्रधानमन्त्री केपी शर्मा ओलीले नियन्त्रण तथा रोकथामका लागि विज्ञहरुसँग छलफल थालेका छन् । लकडाउनको अन्त्य गर्दै जनजीवन सहज बनाउने प्रयास गरेपछि कोरोना संक्रमण डरलाग्दो गरी फैलिन पुगेपछि विज्ञहरुले फेरि लकडाउन लगायत सुरक्षाका अरु उपाय अपनाउनुपर्ने सुझाव दिँर्दै आएका थिए ।
प्रधानमन्त्री निवास बालुवाटारमा जारी छलफलमा विभिन्न क्षेत्रका विज्ञ तथा प्रमुख प्रतिपक्ष दलका नेताहरु समेत सहभागी छन् । छलफलमा काँग्रेस सभापति शेरबहादुर देउवा र जनता समाजवादी दलका महन्त ठाकुर पनि सहभागी छन् । मुलुकमा पछिल्लो समय कोरोना भाइरसका संक्रमित बढ्दै गएका छन् ।
सरकारले लकडाउन खुला गरेपछि संक्रमण फैलिएको भन्दै विज्ञहरुले पुनः लकडाउन गर्नुपर्ने सुझाव दिँदै आएका छन् । सरकारले विज्ञहरुको राय बुझेर लकडाउन गर्ने या नगर्ने भन्ने निर्णय गर्ने तयारी गरेको छ । बैठक सीसीएमसीका पदाधिकारीको पनि सहभागिता रहेको छ ।
