काठमाडौं । सामाजिक परिवर्तनका लागि अभियान थालेको प्रदेश दुई सरकारले माघ २ गतेदेखि ‘मुख्यमन्त्री बेटी पढाऊ, बेटी बचाऊ’ कार्यक्रम अन्तर्गते छोरी शिक्षा बीमालाई जनस्तरसम्म लैजानको लागि छोरी बीमा सप्ताह कार्यमक्रम संचालन गर्ने भएको छ ।
प्रदेश नं. २ सरकारले ०७५ माघ १ गते यता उक्त प्रदेशमा जन्मेका छोरीहरुको शिक्षाका लागि बीमा गर्ने घोषणा गरेको थियो । साथै उक्त प्रदेश सरकारले बीमालगायतको अन्य सुविधा प्रदान गर्ने गरी सप्ताह मनाउने निर्णय गरेको हो ।
माघ २ गतेदेखि ९ गतेसम्म चल्ने उक्त अभियानमा प्रदेश २ अन्तर्गतका आठ वटै जिल्लाका अभिभावकले आफ्ना नवजात छोरीहरुको बीमा गराउन पाउने भएका छन् ।
उक्त कार्यक्रममा शिक्षा बीमाका साथै छोरीहरुको स्वास्थ्य जाँच, निःशुल्क औषधि वितरणसहितका कार्यक्रम समेत गरिने बताइएको छ । यस अभियानले विभिन्न कारण बीमा गराउन नसकेका छोरीहरुलाई समेट्दै अघि बढ्ने प्रदेश सरकारको लक्ष्य रहेको छ ।