काठमाडौं । मान्छेले आवेगमा अपराध गर्छ र फुर्सदमा पछुताउँछ भनिन्छ । यस्तै भयो भक्तपुर हत्याकाण्डमा पनि आवेगमा आमाछोराको हत्या गरेका सुदीप अधिकारीले झण्डै २४ घण्टासम्म पछुताए त्यतिबेला संसार सबै अध्यारो देखे, नदेखुन पनि कसरी त्यति ठूलो अपराध भइसकेको थियो र जीवन त्याग्नुको विकल्प नदेखेपछि दुवै मोबाइल फोन स्वीच अफ गरेर घटघटी विष पिए ।
मध्यपुर ठिमी नगरपालिका–९ निकोसेरास्थित आफ्नै घरमा मृत फेला परेका सुदीप अधिकारी दम्पत्ति र छोरा सुशान्तको शव परीक्षणको विस्तृत रिपोर्टले यस्तो वास्तविकता बाहिर ल्याएको हो । भदौ २६ मा साँझपख मृत फेला परेका श्रीमती, छोरा र सुदीपको मृत्यु २४ घण्टाको समय अन्तरमा भएको पोष्टमार्टम रिपोर्टबाट खुलेको छ ।
भक्तपुरस्थित काठमाडौं मेडिकल कलेजमा गरिएको शव परीक्षण रिपोर्ट अनुसार छोराको टाउकोमा ४ वटा चोट र सुशान्तको टाउकोमा तीन पटक दाउले हिर्काएको चोट देखिएको छ । सुशान्तको घाँटीमा हतियारले काटेको गहिरो चोट देखिएको छ । पोष्टमार्टम रिपोर्टसँगै अनुसन्धानमा संलग्न प्रहरी अधिकृतहरुले सुदीपले २४ घण्टाअघि श्रीमती र छोराको हत्यापछि आफूले विष खाएर आत्महत्या गरेको निष्कर्ष निकालेका छन् । शव फेला परेको ४८ घण्टाअघि श्रीमती–छोरा र २४ घण्टाअघि सुदीपको मृत्यु भएको देखिएको छ, महानगरीय अपराध महाशाखाका प्रहरी वरिष्ठ उपरिक्षक एसएसपी दीपक थापाले भने, सुदीपले विष सेवन गरेको कुरा पोष्टमार्टमबाट पनि खुलेको हुनाले हत्यापछि आत्महत्या गरेको देखियो ।
सुदीप डिप्रेशनमा थिए । घरमा झै–झगडा गरिरहने कुरा छिमेकीले पनि प्रहरीलाई बताएका छन् । सुदीपले भदौ २४ मा राति श्रीमती र छोराको हत्या गरेको प्रहरीको अनुसन्धान निष्कर्ष छ । हत्यापछि उनले दुवैको मोबाइल बिहान ४ बजेर १३ मिनेटमा एकैपटक अफ गरिदिएका थिए । भोलिपल्ट उनले विष खाएर आत्महत्या गरेको प्रहरीको निष्कर्ष छ । विषको दुई वटा बट्टा छतबाट बाहिर फालेको अवस्थामा प्रहरीले बरामद गरेको छ । उनीहरुको भि–सेरा परीक्षणका लागि नेपाल प्रहरीको सामाखुसी स्थित विधिविज्ञान प्रयोगशालामा पठाइएको छ ।
