काठमाडौं । विश्वलाई सन्त्रास फैलाइरहेको कोरोना संक्रमणले छिमेकी मुलुक भारतमा २२ जनालाई संक्रमित बनाएको छ । पछिल्लो २४ घण्टामा थप १५ जनामा संक्रमण देखिएका हुन् । संक्रमित मध्ये तीन जना निको भइसकेका छन् । भारतमा पहिलो पटक केरलामा कोरोनाको संकेत देखिएको थियो । १९ जना संक्रमितलाई चिकित्सकको निगरानीमा अस्पतालमा राखेर उपचार गराई रहेको त्यहाँको स्वास्थ्य मन्त्रालयले जनाएको छ । चीनबाट सुरु भएको कोरोना भाइरसको संक्रमण भारतको केरलाका साथै दिल्ली, तेलंगना, जयपुर लगायतका क्षेत्रमा देखा परेको भारतीय सञ्चारमाध्यमहरुले जनाएका छन् ।