धादिङ। सरकारी मुआब्जाप्रति असन्तुष्टि जनाउँदै आन्दोलनरत आरुघाटवासीले केही दिनका लागि आन्दोलन स्थगित गरेका छन् । वार्ता र छलफलको माध्यमबाट समस्याको समाधान खोज्न आन्दोलन स्थगित गरिएको बताइएको छ । जिल्ला मुआब्जा समितिले बुढीगण्डकी आयोजनाको बजार क्षेत्रमा पर्ने गोरखाको आरुघाट, आर्र्खेत र धादिङको विशालनगर र खहरे बजारको मुआब्जा निर्धारण गरेपछि स्थानीय वासिन्दा आन्दोलित भएका थिए । आन्दोलनकारीले आरुघाट बजार अनिश्चितकालीन बन्द गर्नुका साथै काठमाडौंको माइतीघरमा पनि प्रदर्शन गरेका थिए ।
केही समयका लागि आन्दोलन रोक्ने निर्णय सँगै आरुघाट बजार खुलेको छ । आरुघाट गाउँपालिकाको कार्यालयमा लगाइएको ताल्चा पनि खुलेको बताइन्छ । मुआब्जा पुनरावलोकनका लागि गृह मन्त्रालयमा निवेदन दिने निर्णय समेत गरिएको बताइन्छ । १५ दिनभित्र उजुरीको उचित किसिमले सम्बोधन नभए जग्गा फुकुवा गर्न माग गर्ने चेतावनी समेत दिएका छन् ।
ऊर्जामन्त्री सँग छलफल गर्नका लागि वार्ता समिति बनेको छ, समितिमा गोरखा र धादिङका वहालवाला तथा पूर्वमाननीयहरु, पूर्वमन्त्री, गोरखाको आरुघाट गाउँपालिका र धादिङको त्रिपुरासुन्दरी गाउँपालिकाका अध्यक्ष, जिल्ला समन्वय समितिका सदस्यहरु, सम्बन्धित वडाका अध्यक्ष र सरोकार समितिका संयोजकहरु रहेका छन् । बुढीगण्डकी डुवानमा पर्ने आरुघाटलगायतका बजार क्षेत्रको प्रति आना ५० हजार देखि ७ लाखसम्म मुआब्जा तोकिएको थियो ।
