काठमाडौं । कोरोना संक्रमणले विश्व अर्थतन्त्रलाई तहसनहस पारिसेको छ । लाखौंको रोजगारी गुमिसकेको छ भने अझै रोजगारी गुमाउनेको संख्या थपिनेक्रममा छ । नेपाल वैदेशिक रोजगारीको रेमिट्यान्सबाट चलेको मुलुक । यस्ता मुलुकलाई कोरोनाको असर धेरै ठूलो पर्ने निश्चित छ । तर सरकारले त्यसको सामना गर्ने गरी अघि बढ्ने प्रयास खासै गरेको देखिएको छैन । बजेटको तयारीमा रहेका बेला यस्ता रोजागरी गुमाउने युवाहरुका लागि कार्यक्रम समावेश गरियो भने फेरि यो नेपालका लागि अवसर पनि हुनसक्छ । कोरोना भाइरसको महामारीबाट लाखौं नेपाली युवाले रोजगारी पाइरहेको मलेसिया निकै प्रभावित बन्न सक्ने देखिएको छ । महामारीको कारण देखिएको गिरावटले मलेसियाका उत्पादनमूलक क्षेत्रका कम्पनीले ३० प्रतिशत कर्मचारी कटौती गर्न सक्ने एक सर्वेक्षणले देखाएको छ । मलेसियन एप्लोयर्स फेडेरेसन (एमईएफ) ले गरेको सर्वेक्षणले ८० प्रतिशत कम्पनीले कर्मचारी कटौती गर्न सक्ने बताएको हो । सर्वेक्षणले कम्पनीहरुलाई कर्मचारी कटौती नगर्न सरकारले दिएको राहत पर्याप्त नरहेको देखाएको हो । एमईएफका अनुसार मुलुकमा लगाइएको लकडाउनको कारण साना व्यवसायहरु नयाँ कर्मचारी भित्र्याउन नसक्ने अवस्थामा पुगेका छन् भने आफ्ना कर्मचारी पनि घटाउने अवस्थामा पुगेका छन् ।
यद्यपि विशेषज्ञहरुले भने मलेसियाको अर्थतन्त्र केही समयमा सुधार हुने आशा व्यक्त गरेका छन् । अर्थतन्त्र सुधार आएसँगै मलेसियाका व्यवसायहरु पनि पहिलाकै अवस्थामा फर्किन सक्ने उनीहरुको भनाइ छ । मलेसियाको अर्थतन्त्रमा उत्पादनमूलक क्षेत्रको महत्वपूर्ण हिस्सा रहँदै आएको छ । यो क्षेत्रले मुलुकको अर्थतन्त्रको २० प्रतिशत हिस्सा ओगटेको छ । साथै यो क्षेत्रमा २० लाखभन्दा धेरै मानिसले काम गरिरहेका छन् । यसैबीच मलेसियन इस्टिच्युट अफ इकोनोमिक रिसर्चले कोरोना भाइरसको महामारीको कारण करिब २० लाख मानिसले आफ्नो रोजगारी गुमाउने आकलन गरेको छ । जसमध्ये ६० प्रतिशत कम दक्षता भएका कर्मचारीहरु रहनेछन् ।