काठमाडौँ । माथिको आदेश भन्दै परराष्ट्र मन्त्रालयले ई–पासपोर्ट छाप्नेसम्बन्धी बोलपत्र एकाएक रद्द गरेको छ । बोलपत्र खोल्ने मिति भन्दा एक दिन अगाडि मात्रै राहदानी विभागले एकाएक टेन्डर रद्द गरेको हो । राहदानी छपाईको बोलपत्र निश्चित कम्पनीहरुको मात्रै प्रावधान पुग्ने गरी गरेका कारण विवाद हुँदै आएको थियो। ई–पासपोर्ट प्रणालीमा जाने निर्णय गरी सरकारले ५० लाख राहदानीका लागि अन्तर्राष्ट्रिय बोलपत्र आह्वान गरेको थियो । जसअनुसार गत भदौ १० मा जारी भएको बोलपत्रमा सुरुमा ४५ दिनको मिति राखिएकोमा बीचमा दुई पटक म्याद थपेर बोलपत्र खोल्ने मिति सारिएको थियो ।
विभागका अनुसार अहिले करीव ७ लाख ५० हजार एमआरपी स्टक छ र यसले बढीमा १ वर्षसम्मका लागि सेवाग्राहीलाई एमआरपी उपलब्ध गराउन सकिनेछ। यसो त अन्तर्राष्ट्रिय नागरिक उड्डयन निकाय (आइकाओ)ले सन् २०२५ भित्रमा ई–पासपोर्ट प्रयोगमा ल्याउनुपर्ने निर्देशन जारी गरिसकेको छ। यही तयारीस्वरुप परराष्ट्रमन्त्री प्रदीप ज्ञवालीकै सक्रियतामा ई–पासपोर्ट कार्यान्वयनको पहल थालिएपनि हाल आएर सुस्तता देखिएको हो ।
