काठमाण्डौ । मिथिला लघुवित्त वित्तीय संस्था लिमिटेडको खुद नाफा र आम्दानी दुवै बढेको छ । संस्थाले चालु आव २०८१–८२ को पहिलो त्रैमाससम्ममा १ करोड १ लाख रुपैयाँ खुद नाफा आर्जन गरेको छ । यो रकम अघिल्लो आवको तुलनामा ३५.८० प्रतिशतले धेरै हो । अघिल्लो आवको पहिलो त्रैमाससम्म भने संस्थाले ७४ लाख ४४ हजार रुपैयाँ मात्रै खुद नाफा कमाएको थियो । संस्थाको खुद ब्याज आम्दानी पनि वृद्धि भएको छ । संस्थाले चालु आवको पहिलो त्रैमाससम्ममा ३ करोड ९३ लाख रुपैयाँ खुद ब्याज आम्दानी गरेको छ । यो रकम अघिल्लो आवको सोही अवधिको तुलनामा ४२.४६ प्रतिशतले बढी हो । अघिल्लो आवको पहिलो त्रैमाससम्म संस्थाले २ करोड ७६ लाख रुपैयाँबराबरको खुद ब्याज आम्दानी गरेको थियो । समीक्षा अवधिसम्म संस्थाले १ करोड ८ लाख रुपैयाँबराबरको सञ्चालन मुनाफा आर्जन गरेको छ । संस्थाको कर्मचारी खर्च ६.२२ प्रतिशतले बढेर १ करोड ९० लाख र अन्य सञ्चालन खर्च पनि ६०.६२ प्रतिशतले बढेर ७० लाख १६ हजार रुपैयाँ पुगेको छ । यस्तै संस्थाको रिजर्भको आकार २४.९३ प्रतिशतले बढेर १५ करोड २८ लाख रुपैयाँ पुगेको छ । समीक्षा अवधिसम्म संस्थाको निक्षेप संलकन १ अर्ब ६ करोड र कर्जा प्रवाह २ अर्ब ७५ करोड रुपैयाँ रहेको छ । संस्थाको खराब कर्जा अनुपात बढेको छ । अघिल्लो आवको पहिलो त्रैमाससम्म ४.६९ प्रतिशत रहेको खराब कर्जा अनुपात बढेर ५.१८ प्रतिशत पुगेको छ । समीक्षा अवधिसम्म संस्थाको प्रतिसेयर आम्दानी ईपीएस २०.६३ रुपैयाँ,प्रतिसयर नेटवर्थ १७८ रुपैयाँ,प्रतिसेयर कुल सम्पत्तिको मूल्य १ हजार ६१० रुपैयाँ,मूल्य आम्दानी अनुपात ८०.४१ गुणा र तरलता अनुपात १०.३८ प्रतिशत रहेको छ ।
