काठमाडौं । लण्डनस्थित फाईनान्सियल टाईम्सले हरेक वर्ष प्रदान गर्ने बैंक अफ दी ईयर २०१९ अवार्ड हात पार्न मेगा बैंक नेपाल सफल भएको छ । हरेक वर्ष उत्कृष्ट बैंकलाई प्रदान गरिने उक्त अवार्ड यस वर्ष मेगाले जित्न सफल भएको हो । ९ वर्षअघि स्थापना भएको मेगाको १० अर्ब ३८ करोड चुक्ता पुँजी छ भने वासलात १०२ अर्ब रूपैयाँ बराबरको रहेको छ ।
निक्षेप संकलनमा अग्रणी मेगाले करिव ७९ अर्ब रुपैयाँ निक्षेप संकलन गरेको छ । बैंकले आर्थिक वर्ष २०७५–०७६ मा १ अर्ब ७१ करोड ९३ लाख रुपैयाँ मुनाफा आर्जन गरेको थियो । ६ लाख भन्दा बढी ग्राहकलाई बैकिङ सेवा दिँदै आएको मेगाका १०२ वटा शाखा सञ्जाल रहेका छन् । १९ वटा एक्टेन्शन काउन्टर विस्तार गरेको बैंकको २५ सय भन्दा बढी मेगा रेमीट एजेण्ट र ११९ वटा शाखारहित बैंकिङ सेवा छन् ।
गत बर्ष एनएमबी बैंकले सो अवार्ड प्राप्त गरेको थियो । मेगा बैंकले संचालन जोखिमलाई न्यून गर्न सफल भएकोमा फाईनान्सियल टाईम्सको निर्णायक मण्डलले यस वर्ष उसलाई छनौट गरेको बताइन्छ । हलोदेखि हाइड्रोसम्म भन्ने मूल नारालाई आत्मसाथ गरेको मेगाले बैंक अफ दि ईयरको उपाधी पाएको छ । नोभेम्बर २८ मा लण्डनमा हुने फाईनान्सियल टाईम्सको विशेष कार्यक्रममा यो अवार्ड प्रदान हुनेछ ।
