काठमाडौं । भारत भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने ले भारतीय प्रधानमन्त्री नरेन्द्र मोदी सँग भएको एक घण्टा लामो भेटवार्तालाई अत्यन्त फलदायी र उपयोगी भएको बताएका छन्।
भेटपछि मोदीले सामाजिक सञ्जाल एक्समा गरेको पोस्ट साझा गर्दै लामिछानेले नेपाल र भारतले विगतका सीमितता र अवरोधहरू पार गर्दै विकास–कूटनीतिको नयाँ युगमा प्रवेश गर्न सक्ने विषयमा सकारात्मक संवाद भएको उल्लेख गरेका छन्।
उनले साझा सभ्यतागत सम्बन्ध, डिजिटल करिडोर तथा सहज कनेक्टिभिटीका माध्यमबाट दुवै देशबीच प्रगति र आपसी विश्वासमा आधारित साझेदारीलाई थप सुदृढ बनाउन सकिने विश्वास व्यक्त गरेका छन्।
लामिछानेले नेपाल र भारतका जनताका लागि साझा समृद्धिका अवसरहरूलाई व्यवहारमा रूपान्तरण गर्न रास्वपा प्रतिबद्ध रहेको पनि बताएका छन्।
“आज सम्माननीय प्रधानमन्त्री नरेन्द्र मोदीसँग भएको एक घण्टाको अत्यन्त उपयोगी र फलदायी वार्तामा सहभागी हुन पाउनु खुसीको विषय थियो,” लामिछानेले लेखेका छन्, “नेपाल र भारतले विगतका सीमितता र बाधाहरू पार गर्दै विकास–कूटनीतिको नयाँ युगमा प्रवेश गर्न सक्छन् भन्ने तपाईंको दृष्टिकोणसँग म सहमत छु।”
भेटवार्तामा दुवै नेताबीच द्विपक्षीय सम्बन्ध, विकास सहकार्य, डिजिटल पूर्वाधार र जनस्तरको सम्पर्क विस्तारका विषयमा समेत छलफल भएको बताइएको छ। रास्वपाले नेपाल–भारत सम्बन्धलाई थप विश्वास, सहकार्य र साझा हितका आधारमा अगाडि बढाउन इच्छुक रहेको जनाएको छ।
