काठमाडौँ । गोंगबु हत्याकाण्डकी अभियुक्तले आफूले हत्या गरेको स्वीकार गरेकी छिन् भने शव भेटिएको दिनभर रमिता हेरेर साँझ एम्बुलेन्स चढेर चितवन कुलेलाम ठोकेको पत्ता लागेको छ । नवज्योती मार्गमा दाङका कृष्णबहादुर बोहराको हत्या गरेर सुटकेशमा शव फाल्ने आरोपीलाई सोमबार प्रहरीले चितवनबाट पक्रेर काठमाडौँ ल्याइसकेको छ ।
आफूलाई कल्पना शाही बताउने हत्या आरोपीको वास्तविक नाम कल्पना मुडवरी भएको खुलेको छ । कृष्णबहादुरसँग उनले सामाजिक सञ्जाल फेसबुकमा कमला पौडेलको नामबाट कुरा गर्ने गरेको समेत प्रहरीले पत्ता लगाएको छ । कल्पनाले शनिवार राति आफ्नो फ्ल्याटमा आएका कृष्णबहादुर बोहरालाई आफैंले मारेको र कसैको सहयोग नलिएको दावी गरेकी छिन् । आफूलाई दुःख दिन आएपछि हत्या गरेको उनले बताएकी छिन् । शव व्यवस्थापनमा चाहिँ उनकी १६ वर्षीया छोरीले सहयोग गरेको रहस्य खुलेको छ । कृष्णबहादुरलाई स्लिपिङ ट्याब्लेट खुवाएको र बलात्कार प्रयास गरेपछि घुँडाले संवेदनशील अंगमा हिर्काउँदा ढलेको कल्पनाको दावी रहेको छ ।
मृत्युपछि बाथरुममा लगेर उनको खुट्टा र टाउको काटेर सुटेकश र जेब्रा झोलामा लगेर सडक किनारमा फालेको कल्पनाले स्वीकार गरेकी छिन् । प्रहरीले ती महिलाको कोठाबाट ह्यामर र मासु काट्ने प्रयोग गरिने दाउ बरामद गरेको छ । त्यो दृश्य चुपचाप हेरिरहेकी कल्पना साँझ एम्बुलेन्स बोलाएर चितवन लागिन् । छोरा–छोरीसहित चितवन शक्तिखोरस्थित घरमा गएकी उनलाई चितवन प्रहरीसँगको समन्वयमा काठमाडौँ प्रहरीले टाँडीबाट पक्रेर काठमाडौँ ल्याएको हो । कल्पनालाई चितवन लैजाने एम्बुलेन्स चालकलाई समेत प्रहरीले मकवानपुरको हेटौंडाबाट नियन्त्रणमा लिएको ।
