लाइफ इन्स्योरेन्स कर्पोरेशन नेपाल जीवन बीमा व्यवसायमा एउटा परिचित र प्रतिष्ठित नाम हो । चालु आर्थिक वर्षको दोस्रो त्रैमाससम्ममा ९ अर्ब ५६ करोड ५२ लाख रुपैयाँ खुद बीमाशुल्क आर्जन गरेको कम्पनीले खुद नाफा पनि ५०.५३ प्रतिशतले बढाएर ११ करोड ५६ लाख पुर्याएको छ । चुक्ता पूँजी २ अर्ब १ करोड रुपियाँ रहेको ०७५–७६ को आम्दानीबाट घोषणा भए अनुसार १० प्रतिशत बोनस सेयर थपिन बाँकी छ भने कम्पनीको जगेडा कोषमा ६३ करोड ४० लाख रुपैया रहेको छ । यसैगरी जीवन बीमा कोषमा ७४ अर्ब २४ करोड ४९ लाख रहेको एलआईसी नेपालको महाविपत्ती कोषमा २३ करोड ६२ लाख रुपियाँ सञ्चित देखिन्छ । कुल ७ लाख ६ हजार ८७९ वटा बीमालेख बिक्री गरेको कम्पनीले ९ अर्ब ६१ करोड १७ लाख रुपियाँ कुल बीमाशुल्क आर्जन गरेको छ । इन्स्योरेन्सको वार्षिक प्रतिशेयर आम्दानी ११ रुपियाँ ५१ पैसा भने प्रतिशेयर नेटवर्थ १४३ रुपियाँ ३० पैसा रहेको छ । कुशल व्यवस्थापन र स्वस्थ प्रतिस्पर्धाका साथ अघि बढेको यस एलआइसी नेपालका कार्यकारी अधिकृत लक्ष्मी प्रसाद दास (एलपी दास) सँग बीमा व्यवसायको विषयमा हामीले गरेको छोटो कुराकानी :

० नेपालमा सञ्चालित बीमा कम्पनीहरूले बीमा समितिको निर्देशिका अनुसार लगानी गरेको नपाइएकोले कडाइ गर्ने नीति लिने विषय चर्चामा आएको छ । त्यसलाई कसरी हेर्नु भएको छ ?
– एलआईसी नेपालमा लगानीसम्बन्धी केही समस्या छैन । बीमा समितिको लगानीसम्बन्धी निर्देशका बमोजिम सम्पूर्ण रकमहरू लगानी गरिएकोछ । बीमा समिति बीमा कम्पनीहरूको नियमन गर्ने संस्था भएकाले लगानी सन्दर्भमा कम्पनीमा गई सुपरिवेक्षण तथा अनुगमन गर्नु राम्रो काम हो । सर्वसाधारण बीमितहरूको रकम सही तरिकाबाट लगानी भएको छ÷छैन हेरिनु पर्दछ ।

० एलआईसीएनको हकमा लगानी बीमा समितिको निर्देशिका अनुसार नै छ ?
– शतप्रतिशत लगानी बीमा समितिको निर्देशिका बमोजिम गरेका छौं । कम्पनीमा लगानी समिति बनाएका छौं । समितिले बजारको अध्ययन गरी सुरक्षित स्थानमा उपलब्ध राम्रो प्रतिफल लिने गरी रकमको लगानी गरिरहेका छौं ।

० दुई बर्ष अघिको साधारण सभा बल्ल गर्दै हुनुहुन्छ । अधिल्लो बर्ष ०७६–७७ को कहिले ? जनताको साधारण सेयर तथा लाखौ बिमकहरूको चासोको विषय रहने कम्पनीको साधारण सभामा ढिलाइ हुनुको कारण ?
– सबै जीवन बीमा कम्पनीहरूमा यो समस्या देखिएको छ । वासलात निर्माणमा नयाँ पद्दति अवलम्ब्न गर्नु पर्ने तथा केही प्राविधिक पक्षहरूको ढिलाइबाट साधारणभा हुन ढिलो भएको हो । तथापि एलआईसी नेपालले हमेशा पारदर्शितालाई अबलम्बन गर्दै वार्षिक साधारणसभा चाँडो गर्ने प्रयास गरिरहन्छ ।

० सेयरको बजार मूल्यका हिसाबले कम्पनीले दिएको प्रतिफल निकै कम देखिन्छ । ०७५–७६ को १० प्रतिशत बोनस सेयर मात्र अब दिने प्रतिफल कस्तो रहला ?
– शेयरको बजार मूल्य खुल्ला बजारमा घटबढ भैरहन्छ । यस कम्पनीलाई आम नागरिकले मन पराएको भन्ने कुरा बजारमा यसको शेयर मूल्य उच्च रहनुबाट बुझ्न सकिन्छ । आम लगानीकर्ता र ग्राहकहरूले हामीप्रति गर्नुभएको विश्वासको लागि धन्यवाद भन्न चाहन्छु । बीमितहरूलाई हामीहरूले यस वर्ष पनि सर्वोत्कृष्ट बोनसदर दिइरहेका छौं भने शेयरधनीहरूलाई १० प्रतिशत बोनस शेयर दिन सफल भएका छौं । भविष्यमा अझ उत्कृष्ट प्रतिफल दिने प्रयासमा छौं ।

० कोभिड–१९ को कारण यस क्षेत्रमा कस्तो प्रभाव पर्यो ?
– कोभिड १९ ले समग्र विश्व अर्थतन्त्रमा नकारात्मक असर गरेको छ । नेपालमा पनि वित्तीय क्षेत्रलाई असर पुर्याएको छ । तथापि, म र मेरो टिमले अवलम्बन गरेको उत्कृष्ट मार्केटिङ र कार्य सम्पादनबाट चालु आव ०७७÷७८ को दोस्रो त्रैमाससम्ममा प्रथम बीमा शुल्कको आर्जन र बीमालेख बिक्रीमा सकारात्मक वृद्धि हासिल गरेका छौं ।

० बीमा लेखा बिक्री, बीमा कोषको सही सञ्चालन, लगानी जस्ता कुरामा तपाईको कम्पनी अलि आक्रामक देखिदैन नि ?
– तपाईंको प्रश्नसँग म सहमत छैन । माथि मैले भनिसकेँ । चालु आवको छ महिनामा हाम्रो आम्दानी, बीमा शुल्क आर्जन र बीमालेख बिक्री सबै बढेर गएको छ । जहाँसम्म बीमाकोष र लगानीको कुरा छ हामीहरूले लगानी निर्देशका बमोजिम उत्कृष्ट तरिबाट सही लगानी गरिरहेका छौं ।

० नयाँ जीबन बीमा कम्पनीहरूको बजारमा आगमनले कम्पनीको व्यापारमा कस्तो प्रभाव पारेको छ ?
– एलआईसी नेपाललाई कुनै नकारात्मक असर छैन । सबै कम्पनीहरूले आ–आफ्नै तरिकाबाट व्यवसाय गरिरहेका छन् । हाम्रो मूल उद्देश्य ग्राहक सेवा र बीमितहरूलाई उच्चतम प्रतिफल दिनु हो । यो दुर्व कार्यमा हामीहरू सफल कम्पनीको रुपमा स्थापित भैसकेका छौं । नयाँ जीवन बीमा कम्पनीहरूको स्थापनाले समग्र जीवन बीमा व्यवासयाको वृद्धि र सचेतना सकारात्मक कार्य भएको महसुस गरेको छु ।

० तपाईको कम्पनीले पनि सेयरको अंकित मूल्य टुक्राउने कुनै प्रस्ताव लादै छ ?
– एलआईसी नेपालको सञ्चालक समितिले अहिलेसम्म शेयरको अंकित मूल्य टुक्य्राउने कुनै प्रस्ताव गरेको छैन ।

० बीमाको बजार निकै बढ्दो अवस्थामा देखिन्छ । तर कम्पनीको चुक्ता पुँजी अझै निकै कम छ नि ?
– एलआईसी नेपाल राष्ट्रको ऐन, कानुनलाई अक्षरस पालना गर्ने कम्पनी हो । नेपाल सरकारले तोकेको चुक्ता पुँजी र २ अर्ब हो । हाम्रो कम्पनीको १८औं वार्षिक साधारणसभा यही फागुन २५ गते छ । उक्त वार्षिक साधारणसभापछि यस कम्पनीको चुक्ता पुँजी २ अर्ब २१ करोड १० लाख पुग्दैछ । हामीहरू तोकिएको चुक्ता पुँजी कायम गर्न कहिल्यै पनि पछि पर्दैनौ ।

० नेपालको वर्तमान राजनीतिक अस्थिरता, कोभिडको प्रभावका माझ आगामी दिनहरूमा नेपालमा जीबन बीमाको बजार आगामी दिनमा कस्तो रहला ?
– म सकारात्मक सोचको मान्छे हुँ । कठिनाईको बीच पनि राम्रो परिणाम निकाल्नुपर्छ भन्ने मेरो धारणा रहन्छ । व्यवसायिक वातावरण राम्रो होस् भन्ने कामना गर्दछु । जस्तोसुकै परिस्थिति रहे पनि जीवन बीमाको आगामी दिनहरू राम्रो छै हुनेछ । स्वच्छ, पारदर्शी, सेवामुखी, राम्रो प्रतिफल प्रदान गर्ने, राम्रा योजनाहरू बजारमा ल्याउने कम्पनीहरू अगाडि आउनेछन् । जीवन बीमा कम्पनीहरूले तत्कालको फाइदा मात्र नहेरी दीर्घकालीन सोच र उद्देश्य राखेर काम गर्नु पर्दछ ।

० व्यवसाय विस्तारमा के कस्ता योजना बनाउनुभएको छ ?
– दक्ष कर्मचारी र अभिकर्ताहरू कम्पनीका मेरुदण्ड हुन् । उहाँहरूको दक्षता अभिवृद्धिको लागि नियमित प्रशिक्षणका कार्यहरू गरिरहेका छौं । मेचीदेखि महाकालीसम्मका मुख्य मुख्य स्थानहरूमा हाम्रा शाखाहरू रहेका छन् । जहाँबाट हाम्रा ग्राहकहरूले सजिलै सेवा सुविधा लिन सकिरहेका छन् । ग्राहक सेवाको लागि हामीहरूले सूचना प्रविधिको उच्चतम प्रयोग गरेका छौं । उत्कृष्ट बोनसदर प्रदान गरेर हाम्रा बीमितहरूलाई सन्तुष्ट बनाएका छौं ।

–  नुरराज कँडेल