धनकुटा । विकास, पूर्वाधार र नगरपालिकाका हरेक गतिविधिमा जनसहभागिता बढाउने उद्देश्यले धनकुटाको महालक्ष्मी नगरपालिकाले टोल विकास संस्था गठन गरेको छ । सरकारी तथा गैरसरकारी सेवाहरुलाई प्रभावकारी बनाउन नगरपालिकाको अग्रसरतामा (प्रतिवडा घरधुरिअनुसार ६ देखि ९) ९ वटा वडामा ७२ वटा टोल विकास संस्था गठन गरिएको नगरपालिकाका सूचना अधिकारी खगेन्द्र नेपालले बताए ।
वडाभन्दा तलका कामलाई प्रभावकारी बनाउन र एकीकृत रुपमा कार्य गर्ने प्रयोजका लागि गठन गरिएका टोल विकास संस्थालाई नगरपालिकाले चालू आवमा कार्यालय व्यवस्थापनदेखि लिएर योजना तर्जुमा गर्ने प्रयोजनका लागि एक/एक लाख बजेट विनियोजन समेत गरिएको बताइएको छ । सूचना अधिकारी नेपालकाअनुसार प्रत्येक टोल विकास संस्थामा ३३ प्रतिशत महिलासहित ११ सदस्यीय समिति रहेको र नगरपालिकामा विधिपूर्वक रुपमा दर्ता गरेर कार्य अघि बढाउने नगरपालिकाको योजना रहेको छ । यसैगरी ९ वटै वडामा उपभोक्ता समिति पनि गठन गरिसकिएको छ ।
वडाभित्रका योजनाहरुलाई प्रभावकारी रुपमा सञ्चालन गर्ने उद्देश्य राखेर नगरपालिकाको अग्रसरतामा सम्बन्धित वडाका जनप्रतिनिधिको रोहबरमा गठन गरिएका समितिलाई अभिमुखिकरण तालिम समेत दिइसकिएको छ । ठेक्का प्रक्रियामा लगाउने बजेट र कार्यक्रमबाहेक उपभोक्ता समितिमार्फत् हुने अन्य कार्यक्रमलाई प्रभावकारी बनाउनका लागि उपभोक्ता समिति गठन गरिएको नगरपालिकाका प्रमुख प्रशासकीय अधिकृत शहदेव रायमाझीले बताएका छन् । रायमाझीकाअनुसार, उपभोक्ता समितिहरुले वडाको सिफारिशमा योजना सम्झौता गर्ने कार्य अगाडि बढाइसकेका छन् । जनसहभागिता बढाउने कार्यमा नगरपालिका द्रुत रुपमा अगाडि बढेको रायमाझीले बताए ।
यसैगरी नगरपालिकाका मेयर पर्शुराम नेपालले केही दिनअघि नगरपालिकाभित्रका नागरिकलाई सुविधा दिने उद्देश्यले १ करोड ८४ लाख लागत अनुमान गरिएको महालक्ष्मी सामुदायिक भवनको उद्घाटन गरेका थिए । त्यसैगरी नगरपालिकाको ६ र ७ नम्बर वडाको बीचमा पर्ने करिब ३ करोड लागतमा बनझाँक्री पार्क निर्माण र करिब डेढ करोड लागतको महालक्ष्मी मन्दिर निर्माण कार्य अगाडि बढाइएको बताइएको छ ।
