काठमाडौं । देशमा रोजीरोटी नभेटेपछि विदेशी भूमिमा पसिना बगाउन पुगेका लाखौं युवा अहिले मातृभूमि र सरकारको पर्खाइमा छन् । उनीहरु उद्दारका लागि सरकारसँग हारगुहार गरिरहेका छन् । त्यस्ता युवाको संख्या झण्डै १० लाख रहेको अनुमान गरिएको छ । विदेशमा समस्यामा परेका नेपाली श्रमिक, विद्यार्थी र अन्य नागरिकलाई स्वदेश फर्काउन दैनिक १० वटासम्म उडान व्यवस्थापन गर्न लागिएको छ । त्यसो हुँदा कम्तिमा दिनमा २५ सय नागरिक विदेशबाट काठमाडौं उत्रिनेछन् । संसदमा उद्योग वाणिज्य आपूर्ति तथा श्रम तथा रोजगार समिति बैठकमा सरकारले यस्तो आँकडा पेश गरेको हो । समितिले तत्कालै नेपालीहरुलाई स्वदेश फर्काउने प्रक्रिया थाल्न र विभिन्न देशका विमानलाई नेपाली नागरिक ल्याउनका लागि उडान अनुमति दिन सरकारलाई निर्देश गरेको छ । जुन ८ देखि १० भित्रमा चार्टर उडान शुरु हुने समितिमा सरकारले जानकारी दिएको छ । सरकारले तत्कालै कति नेपालीलाई विदेशबाट उद्धार गर्नुपर्ने भन्ने तथ्यांक संकलन गरिरहेको छ ।