काठमाडौं । विशेष आर्थिक क्षेत्र प्राधिकरणको कार्यकारी निर्देशक पदका लागि आधा दर्जनको निवेदन परेको छ । उद्योग, बाणिज्य तथा आपूर्ति मन्त्रालयले प्राधिकरणको कार्यकारी निर्देशकका लागि केही समय अघि सार्वजनिक रुपमा पदपूर्तिका लागि आह्वान गरेको थियो । मन्त्रालयले आह्वान गरेको समयसिमा शुक्रबार दिउँसो ३ बजेसम्म थियो ।
मन्त्रालय स्रोतकाअनुसार, समयसीमाभित्र निवेदन दिनेहरुमा चण्डिका भट्ट (गोरखा), जनार्दन गुरागाई (काठमाडौं), शिवकुमार दाहाल (तनहुँ), रामदेव यादव (धनुषा), रघुराज काफ्ने (तनहुँ) र योगेन्द्र गौचन (काठमाडौं) रहेका छन् । आजैमात्र तीनजनाले दरखास्त दिएको स्रोतले जानकारी दिएको छ । अन्तिममा शिवकुमार दाहालले दरखास्त दर्ता गराएको बुझिएको छ । सिफारिश समितिको कार्यालय संंस्थान शाखामा गोप्य खामबन्दीमा इच्छुक उम्मेदवारहरुले कार्ययोजना र दरखास्त पेश गरेका छन् ।
दरखास्त दिनेहरुमा भट्ट प्राधिकरणको कार्यकारी निर्देशकमा एक कार्यकाल बिताएर हालैमात्र बिदा भएका पूर्व कार्यकारी निर्देशक हुन् । गुरागाई स्वास्थ्य तथा जनसंख्या मन्त्रालयबाट सहसचिव पदबाट उमेरहदका कारण केही दिनअघिमात्र अवकाश पाएका सेवा निवृत्त कर्मचारी हुन् । योगेन्द्र गौचन उद्योग, बाणिज्य तथा आपूर्ति मन्त्रालय मातहतको बाणिज्य तथा आपूर्ति व्यवस्थापन विभागको महानिर्देशक पदबाट कात्तिक १४ गते अवकाश पाएका सेवा निवृत्त कर्मचारी हुन् । दाहाल, यादव र काङ्खले भने अन्य क्षेत्रमा अनुभव हासिल गरेको व्यक्ति भएको बताइन्छ । दरखास्त दिने समय समाप्त भएपछि सिफारिश समितिको बैठक आइतबार बोलाइएको बताइएको छ ।
सिफारिश समितिमा राष्ट्रिय योजना आयोगका सदस्य (उद्योग बाणिज्य हेर्ने) डा. रामकुमार फुयालको संयोजकत्वमा तीन सदस्यीय समितिले दरखास्त दिएका उम्मेदवारहरुको प्रस्तुति लिने कार्यक्रम रहेको छ । फुयाल समितिमा बाणिज्य विज्ञ एवं पूर्व बाणिज्य सचिव पुरुषोत्तम ओझा र उद्योग, बाणिज्य तथा आपूर्ति मन्त्रालय (उद्योग) सचिव एमकुमारी खतिवडा रहेका छन् । यो समितिको बैठक आइतबार बसी कार्य विधि तयार गरी कार्यकारी निर्देशक नियुक्ति सिफारिशका लागि आवश्यक प्रक्रिया अगाडि बढाइने बताइएको छ । सिफारिश समितिले सम्भावित तीन जनाको नाम उद्योग, बाणिज्य तथा आपूर्ति मन्त्रालयसमक्ष सिफारिश गर्ने र मन्त्रालयले निर्णयका लागि मन्त्रिपरिषद्मा प्रस्ताव लैजाने प्रक्रिया रहेको छ ।
