काठमाडौं । नीतिगत चुरो कुरोमा प्रवेशै नगरी व्यक्तिमै केन्द्रीत नेकपाको सचिवालय बैठकले निश्कर्ष निकाल्न सकेन । राजनीतिमा तुरुप फाल्न र माहौल मोड्न निकै खप्पिस खेलाडीका रुपमा मैदानमा उत्रिएका प्रधानमन्त्री केपी शर्मा ओलीले उपाध्यक्ष वामदेव गौतमलाई प्रधानमन्त्री बनाउने नयाँ तुरुप फालेका छन् । नेकपाभित्रको गुटगत राजनीतिलाई भताभुंग बनाउन र आफ्नो कुर्सी बलियो बनाउन ओलीले यस्तो खेल शुरु गरेका हुन् । यसअघि पार्टीले गौतमलाई राष्ट्रियसभामा मनोनयन गर्न सिफारिस गर्दासमेत सिफारिस नगरेका ओलीले बुधबारको सचिवालय बैठकमा एकाएक प्रधानमन्त्री बनाउने प्रस्ताव ल्याएका हुन् । राष्ट्रियसभा सदस्य बनाउन अस्वीकार गरेका ओलीले संसद नै नरहेका गौतमलाई ओलीले प्रधानमन्त्री बनाउने प्रस्ताव गरेपछि सचिवालय बैठकमा नेताहरु आश्चर्यचकित भएका थिए । संवैधानिक व्यवस्थाअनुसार राष्ट्रियसभा सदस्य भए पनि प्रधानमन्त्री बन्न पाइँदैन । प्रधानमन्त्री ओलीले गौतमलाई मात्रै होइन वरिष्ठ नेता मावधकुमार नेपाललाई पनि तेस्रो अध्यक्ष बनाउने प्रस्ताव गरेका छन् । बैठकमा प्रचण्ड र माधव नेपाललगायतका सचिवालयका अधिकांश सदस्यले ओलीले प्रधानमन्त्री र पार्टी अध्यक्षबाट राजीनामा दिनुपर्ने माग गरेका बेला अध्यक्ष तथा प्रधानमन्त्री ओलीले यस्तो प्रस्ताव ल्याएर माहौल मोड्न सफल भएका थिए । ओली भने राजीनामा पनि नदिने र स्थायी कमिटी पनि नबोलाउने पक्षमा छन् । आफ्नो बचाउमा उत्रिएका ओलीले आफू प्रधानमन्त्री नहुने भए कोरोनाको महामारी रोकिएपछि बामदेव गौतमलाई बनाऔं भन्ने प्रस्ताव राख्दै वरिष्ठ नेता माधव नेपाललाई पनि तेस्रो अध्यक्ष बनाउन प्रस्ताव गरेका हुन् ।