काठमाडौं । नेपाल सांस्कृतिक संघ र नेपाल नेपाली लेखक संघले संयुक्त रुपमा एक विज्ञप्ति प्रकाशित गरी हालै मात्र भारत सरकारले सार्वजनिक गरेको राजनीतिक नक्सामा नेपाली भूभाग कालापानी, लिपुलेक र लिम्पियाधुरा समावेश गरेकोमा गम्भीर ध्यानाकर्षण भएको जनाएको छ । भारतले नेपालको अविभाज्य भूमि कालापानी, लिपुलेक र लिम्पियाधुरालाई बलमिच्याई गरेर आफ्नो नक्सामा पारेकोमा घोर आपत्ति प्रकट गर्दै सार्वभौम राष्ट्रको सीमामाथि गरिएको अतिक्रमण कुनै पनि हालतमा सैह्य नहुने जनाइएको छ । छिमेकीको यस्तो विस्तारवादी नीतिको कडा शब्दमा विरोध पनि गर्दै सीमा विवादलाई सुल्झाई अतिक्रमण परेको नेपाली भूमि तत्काल फिर्ता गराउन र नेपाली भूमिबाट भारतीय सैनिक तत्काल हटाउन सरकारसँग जोडदार रुपमा माग गरिएको छ । नेपाली लेखक संघका अध्यक्ष श्रवण मुकारुङ र नेपाल सांस्कृतिक संघका सभापति तीर्थबहादुर थापाद्वारा जारी विज्ञप्तिमा द्विपक्षीय संवादबाट सीमा समस्याको समाधान ननिस्किए उक्त मुद्दालाई अन्तर्राष्ट्रियकरण गर्न पनि माग गरिएको छ ।