काठमाडौं । दिनदिनै रेकडै ब्रेक गर्दै बढेको सुनको भाउले हिजोको रेकर्ड आज ब्रेक गर्दै अघि बढेको छ । बिहीबार सुनको भाउ तोलामा ५०० रुपैयाँले बढेर हालसम्मकै उच्च विन्दुमा पुगेको छ। नेपाल सुनचाँदी व्यवसायी महासँघले बिहीबार छापावाला सुनको भाउ प्रतितोला ९४ हजार ५०० रुपैयाँ र तेजाबी सुनको भाउ प्रतितोला ९४ हजार ६५ रुपैयाँ कायम गरेको छ। यो नेपाली बजारमा हालसम्मकै उच्च भाउ हो। कोरोनाको कारण लगानीका क्षेत्रहरु अस्थिर हुँदा सुनमा लगानी बढेकोले अन्तराष्ट्रिय क्षेत्रमा सुनको भाउ बढ्दै गएको सुनचाँदी व्यवसायी तेज रत्न शाक्य बताउंछन्। अन्तराष्ट्रिय बजारमा सुनको भाउ बढ्दै गएकाले नेपाली बजारमा पनि सुनको भाउ बढ्दै गएको उनले बताए। सुनको भाउ अझै बढ्न सक्ने शाक्य बताउँछन्।
अन्तराष्ट्रिय क्षेत्रका विज्ञहरुले पनि सन् २०२० को अन्त्यसम्ममा सुनको भाउ २ हजार डलर पुग्न सक्ने प्रक्षेपण गर्दै आएका छन्। अन्तराष्ट्रिय बजारमा सुनको भाउ २ हजार डलर पुगेमा नेपाली बजारमा प्रतितोला सुनको भाउ एक लाख रुपैयाँ भन्दा माथि पुग्नेछ।