काठमाडौं । पर्यटन वर्षलाई लक्षित गरी सरकारले नयाँ ट्याक्सी दर्ता खोल्ने तयारी गरेको छ । सुविधायुक्त ट्याक्सी थप्ने उद्देश्यले यस्तो तयारी भएको बताइएको छ । नजिकिँदो भ्रमण वर्ष २०२० लाई लक्षित गरी यात्रुलाई सुविधायुक्त सवारीसाधन आवश्यक भएको भन्दै नयाँ ट्याक्सी दर्ता खुलाउन लागिएको यातायात व्यवस्था विभागले जनाएको छ । अब थपिने ट्याक्सी पहिलेको जस्तो सानो क्षमताको नहुने र ठूला सीसीका सुविधायुक्त हुने बताइएको छ ।
ट्याक्सीको दर्ता नियमितरूपमा खुलाउनेभन्दा पनि केही समयका लागि खुलाइने बताइएको छ । सरकारले लामो समयदेखि ट्याक्सीको दर्ता बन्द गरेकामा भूकम्पीडितलाई राहत दिने भन्दै विसं २०७२ भूकम्पीडित जिल्लावासीका लागि ट्याक्सीको दर्ता खुलाएको थियो । अहिले सडकमा रहेका ट्याक्सीमध्ये अधिकांश ८०० सीसीका छन् । सिट पनि साँघुरो र कम क्षमताको हुँदा यात्रुलाई असहज रहेको छ ।